Eguraldia pixkanaka hobetu eta tenperatura epelduz doan heinean, gero eta korrikalari gehiago ikusiko ditugu herrian zehar, batera eta bestera. Eta batzuk, sasoi puntu ona hartu nahian ere ariko dira, aurreneko lasterketei begira. Izan ere, zenbait tokitan dagoeneko abiatu badira ere, hemen inguruan ate joka dauzkagu herri krosak: otsailean izango dira horietako bi.
Bi aste barru izango dute aurreneko zita, Urnietan. On Bosko Krosa antolatu du Salesiarren ikastetxeak, hirugarren urtez, otsailaren 18rako, igandearekin. 7 kilometroko ibilbidea osatuko dute, ikastetxetik abiatu eta herriko erdigunea eta hainbat auzo zeharkatuz, berriro ikastetxera bueltatzeko. 11:00etan hasiko da.
Aurtengo nobedadea, Ipar Martxaren lasterketa izango da. 11:01etan abiatuko dira, 6 kilometroko ibilbidea egiteko.
Sagar Lasterra, 12garrenez sagardotegien bidetik
Eta astebete beranduago, otsailaren 24an izango da urteko estreinako lasterketa, Hernanin. 12garren edizioa izango du aurtengoa, Sagar Lasterra herri lasterketak. Eta aurtengoan ere, sagardotegien bidetik egingo dute, guztira 8,9 kilometroko ibilbidea osatuz.
Goizeko 11:00etan abiatuko dira Ibarluze poligonotik, Hernaniko Arraun Elkartearen aurretik; eta sagardotegiz sagardotegi joan ondoren, Ave Maria parkean izango dute helmuga, korrikalariek.
Izenemateak zabalik, Kirolprobak eta Herrikrosa web orrietan
Bi probetarako, izenemateak zabalik daude, eta internet bidez apuntatu behar da. Horrela, Sagar Lasterran parte hartzeko, www.kirolprobak.com web orrian eman behar da izena: 9 euro dira txip horia edukiz gero, eta 11 euro txipa behar izanez gero. Bezperara arte izango da aukera, eta egunean bertan ere bai, baina 16 euroan.
Partehartzaile bakoitzak, kamixeta jasoko du opari, eta zozketak ere egingo dituzte bukaeran, partehartzaile guztien artean: Hernaniko sagardotegietan otorduak bi lagunentzat, Turismo Sailaren pakete turistikoak 3-10 lagunentzat... Txapela eta trofeoak, berriz, aurreneko hiru gizon eta emakumeei emango dizkiete, kategoria absolutuan eta beteranoen artean.
Internet bidez apuntatu behar da On Bosko Kroserako ere, baina www.herrikrosa.eus web orrian izango da. 10 euro dira, eta hilaren 16ra arte dago aukera; ikastetxeko idazkaritzan ere apuntatu daiteke. Bestela, egunean bertan ere izango da aukera, 15 euroan.
On Boskon ere, opari bana jasoko dute partehartzaile guztiek, lasterketa bukatzean; eta zozketa ugari egingo dituzte. Garaikurra, berriz, probako aurreneko hiru gizon eta emakumeek jasoko dute.