Etzirako ere planak aldatu egin dira eguraldi-iragarpenak direla eta. Hortaz, iñude eta artzaien konpartsa ez da aterako, eta otsailaren 25erako atzeratu dute, eguraldi onaren esperoan.
Ohi bezala, ekitaldi nagusian Musika Bandarekin topo egitea, eta doinuren bat edo beste partekatzea zen asmoa. Ondoren, protagonismo osoa Musika Bandaren esku utziz. Baina, hau ere, ez da hala izango, eta Bandak izango du herria girotzeko erantzukizuna, bete-betean.
Musika Banda Milagrosan, inauterietako erritmoekin
Musika Bandako kideak izango dira aurten datorren asteko inauterien iragarle. Azken aldaketak medio, igande eguerdiko 13:00ean Milagrosan eskainiko dute inauterien aurreko urteroko kontzertua. Tolosako inauterietako doinuak entzun eta beraiekin gozatzeko aukera izango da. Urtero bezala, Hernani eta Tolosaren arteko lotura oholtzaratu nahi dute horrela.
Hurrengo zita gaur zortzi, berezia oso
Hurrengo asteko ostiralean, gaur zortzi, izango dute inauterietako hitzordua. Iluntzeko 20:00etan izango da, Biterin. Berezia izango dela iragarri dute. Batetik, joko dituzten obren artean, Bremengo musikariak ipuin musikatua izango delako.
Eta bestetik, Tinolyn Martin’s ospe haundiko abeslari estatubatuarra izango delako bertan, Hernann in’s Band musik orkestak lagunduta, Lehoi erregearen bertsio pertsonala eskaintzen. Euskal Herrian emango duen kontzertu bakarra izango da.