Gernikaren Urbieta zelaian ezin izango dute jokatu hernaniarrek, egoera kaxkarrean baitago. Hori dela eta, Gernikak jakinarazi die, egoera okertu aurretik eta jokalarien segurtasuna bermatzeko, partidua Igorreko San Txisme zelaian izango dela.
Eguna eta ordua, ordea, ez dira aldatu: etzi izango da, larunbatean, 16:00etan.
Autobusa, Biteritik
Bere horretan geratuko da, baita ere, Hernani Errugbi Taldearen plana. Autobusa antolatu dute, eta Gernikara abiatu beharrean, Igorrera joango da, Biteritik 14:00etan abiatuta.
Azaldu dutenez, oraindik izena emateko aukera badago; Zintzarri tabernan egin behar da 10 euroren truke. Partiduko sarrera ez dago prezioaren barruan, eta beraz, norberak ordaindu beharko du.
Herritarrak gonbidatu dituzte bertaratzera, jokalariek zaleen indarra sentitu dezaten.