Gidabaimena euskeraz atera duten herritarrak saritu eta gainerakoak ere horretara bultzatzeko helburuz, Buruntzaldeako udaletako Euskara Departamentuek, eskualdeko autoeskolekin elkarlanean, urtero kanpaina egiten dute. Hala, aurten 103 lagunek egin dute euskeraz atal teorikoa, eta euskeraren alde egindako hautua eta ahalegina txalotu asmoz, bederatzi sari zozketatu dituzte, hau da, azterketa teorikoak eragindako gastuei aurre egiteko, gehienez ere, 400 euro ematen zaizkio irabazle bakoitzari.
794 lagunek parte hartu dute 2010etik eta aurten gorakada egon da
Iazko datuekin alderatuz, gora egin du kopuruak. Izan ere, iaz 95 lagunek egin zuten euskeraz, eta aurten 103 lagunek. «Beraz, bada pozteko datua» adierazi zuen Koro Etxeberria, Hernaniko alkateorde eta Kultura eta Euskarako zinegotziak.
2010ean abiatu zuten ekimen hau Buruntzaldeko udalek eta gaur arte 794 lagunek hartu dute parte. Horregatik, Koro Etxeberriak datuaren garrantzia azpimarratu zuen eta guztiak zoriondu zituen zozketa egin baino minutu batzuk lehenago.
Esan zuenez, «kanpaina honen xede-talde nagusia gazteak dira. Gazteek asko balioztatzen duten arloa da, eta, gainera, gaztea helduaroarekin lotzen duen ekimen bat da».
Bide batez, eskertzekoa da, Etxeberriaren esanetan, eskualdeko autoeskola guztiek parte-hartzea kanpaina honetan. Ekimenean eskualdeko autoeskola denak hartu dute parte.
Zozketako bederatzi sarituak herriz-herri
Hain zuzen, ostirala eguerdian egin zen zozketa Usurbilen, Potxoenea kultura gunean. Eta hauxe izan zen zozketaren emaitza, eta, horrenbestez, irabazleak: Andoainen; Elixabet Mendizabal eta Amaia Armendariz. Astigarragan; Lierni Roteta. Hernanin; Xabier Murugarren, Beñat Montero eta Nora Bengoetxea. Lasarte-Orian; Alex Salsamendi. Urnietan; Andoni Mugica eta Usurbilen; Ekain Manterola.