Ezin izan zuen torneo bikaina borobildu, Ekain Lizeagak, Trinketeko Gipuzkoako Txapelketan. Igandean jokatu zuen, Iruran, kadete mailako finala; baina galdu egin zuen, Oiarpeko Zalakainen kontra (17-30). Berdinduta joan ziren partidu erdira arte, baina Zalakainen esperientzia nabaritu zen gero, aurten egin baitu debuta Lizeagak, trinketean.
Binakako txapelketa, martxan
Aste honetan, berriz, Gipuzkoako binakako txapelketa abiatu dute, trinketean. Lizeaga bera Aimar Mujikarekin ariko da kadeteetan, baina atseden hartuko dute aurreneko jardunaldian. Oiarpeko eta Hernaniko bina talde dauzkate kontrario, maila horretan.
Nagusietan, berriz, 1go mailan ariko da Oier Gurutzealde, Lopez hernaniarrarekin eta Arruti billabonarrarekin, Behar Zanaren izenean. Eta dagoeneko jokatu zuten aurrenekoa, ostegunean: 40-29 irabazi zieten Gurutzealdek eta Lopezek, Lizaso eta Esnaolari.
Eta bigarren mailan, Egoitz eta Josu Altuna bixkiak izango ditu ordezkari Mundarrok. Gaur ekingo diote, 15:00etan Iruran, Epleren kontra. Bi multzo izango dira, sei taldekoak; astigartarrekin, Eple, Hernani, Azkoitia, Oiarpe eta Intza ariko dira.
Iparraldean ere bai, Gurutzealde
Gainera, Gipuzkoan bakarrik ez, Iparraldeko txapelketan ere ari da Gurutzealde, trinketean. Aurreneko urtea duenez, hirugarren mailan ekin dio, eta badauka esperantza, bigarrenera igotzeko. Sei pelotari daude, eta bost partiduko ligaxka jokatzen ari dira. Momentuz, jokatutako partidua irabazi du (40-16), eta gaur dauka bigarrena, 17:30etan Hendaian, Sarako Bernard Guillaumen kontra.