Batzar irekia deitu du Astigarragako EH Bilduk, astearterako. Ikatza tabernaren gainean izango da, arratsaldeko 19:00etan hasita, eta interesa daukaten herritar guztiei luzatu diete gonbitea.
Hezkuntza, hondakinak eta mugikortasuna, aztergai
Aurreratu dutenez, batzarrean landuko dituzten gai nagusiak, izango dira hezkuntza, hondakinak, eta garraioa eta mugikortasuna. Hala ere, jakinarazi dute, «herritarren galdera eta kezkei erantzuteko saioa» izango dela.
«Herritarrekin konpartitu nahi dugu 2017ak emandakoa, eta herriak aurrean dituen erronka esanguratsuen inguruan, beraiek daukaten iritzia eta balorazioak jaso nahi ditugu», azaldu du EH Bilduk. «Hezkuntzari dagokionez, korapilo ugari daude oraindik askatzeke: eskolaren haundipena, haurreskola berriaren kokapena, DBH... Hondakinen inguruan, aldiz, sistema aldatu zenetik sei hilabete pasa direnean, herritarrekin balorazio partekatua osatu nahi dugu. Eta azkenik, garraioan eta mugikortasunean dauden mehatxuak izango dira hizpide: autobus zerbitzuetan murrizketak, garraio hiria, Petritegi inguruko errepide berria...», aurreratu dute.
Baina horretaz gain, beste edozein gai jorratzeko tartea ere izango da: «guztion artean Astigarraga hobeago bat eraikitzea posible da».