MAIALEN Lujanbio Estatu Batuetan dabil egunotan. Renoko Unibertsitatean (Nevada) bertso saioa egin dute, aste honetan, Maialenek eta Miren Artetxek, Euskal Ikasketen zentroak dioenez. «Euskal poemak sortu dituzte, abestu eta interpretatuz. Euskal poeta gisa itzuli dute bertsolari hitza. Aukera paregabea da bertsolaritzaren artea bertatik bertara ezagutzeko», diote oharrean.
Lujanbio eta Artetxe ez dira horretara bakarrik joan Ameriketako Estatu Batuetara. Cowboy Poetry Gathering jardunaldietan parte hartzekoak dira astelehenetik otsailaren 3ra, eta jardunaldi horietan haiekin batera izango dira Oihana Iguaran bertsolaria eta Jone Miren Hernandez ikerlaria ere. Renoko Euskal Ikerguneak eta Mintzola Ahozko Lantegiak antolatu dute egitasmoa.
Topaketak Elkon, Nevadan, egingo dira
Topaketak egingo dira Elkon, Nevadan, The Western Folklife Centerren eskutik. Topaketa horren baitan antolatu ditu Renoko Euskal Ikerguneak (Center for Basque Studies) Bertsolaritza eta emakumea, marjinazioa eta ahalduntzea izeneko jardunaldiak.
Euskal kulturarekin eta bertsolaritzarekin lotura duten beste zenbait ekintza ere egingo dira: besteak beste, Bertsolari ikus-entzunezkoa eskainiko da.
Jardunaldiak aurrera eramateko ideia 2016ko uztailean sortu zen, Mintzolak antolatutako Europa bat-batean kulturen arteko topaketan. «Aurrerantzean auzolanean segitzeko asmoa dugu Renoko Euskal Ikerguneak eta Mintzolak, nola kantu inprobisatuaren Kulturartea Maparen egitasmoan hala kantu inprobisatuari buruzko jardunaldi edota argitalpenen sustapenean».
Reno eta Elko Nevadako estatuan dauden bi hiri dira. Biak ere Nevadako iparraldean eta batetik bestera 467 kilometro daude.