UDALAK jakinarazi du hondakinen udal tasa iazko bera izango dela aurten, baina urtean bitan ordaindu beharrean, hiru hilabetero ordainduko dela hemendik aurrera (lau ordainagirirekin).
Bestetik, 2018ko tasa eta zergen egutegi fiskala etxeetara banatuko da aste honetan. Hernaniko Udalaren 2018ko tasen eta zergen egutegi fiskalean aldaketa bakarra izango da; hondakinen tasan, hain zuzen ere.
Lau kuota, biren ordez
Orain arte, hondakinen tasa erresidentziala eta landalurrekoa bi kuotetan ordaintzen zen; hemendik aurrera, ordea, diru kopuru bera izango da baina hiru hilabetean behin ordainduko dute herritarrek (urtean lau aldiz, alegia).
Aldaketa horren arrazoia da Udalak, aurtengo urtarrilean hartu duela bere gain Hernaniko industria-poligonoetan sortzen diren hondakinen kudeaketa. Enpresei tasa hiru hilabetean behin kobratzen zaie eta tasa guztien kobraketa batera egiteko helburuz, hiri-hondakinena ere hiru hilean behin kobratuko da.
Lehen ordainagiria ordaintzeko epea otsailaren 5etik martxoaren 9ra artekoa da.
Onura fiskalak, mantendu
Bestalde, onura fiskalak mantendu egingo dira (familiaren diru-sarreren arabera, tasaren %50 edo %100ekoak izan daitezke)-
Helbideratuta dauden erreziboak baimendutako kontuetan kargatuko dira, borondatezko epearen amaieran. Helbideratu gabeak posta arruntaz bidaliko dira helbide fiskalera. Erreziboa jaso ezean, kopia bat eskatu beharko da Herritarren Harrera Zerbitzuan.
UDAL TASAK-ORDAINTZEKO EPEAK
- Ur saneamendua. 2017ko 3garren lauhilekoa; otsailak 1-martxoak 9. 2018ko lehenengo lauhilekoa; ekainak 1-uztailak 13. 2018ko bigarren lauhilekoa; urriak 1-azaroak 9.
- Hondakinak. 2018ko lehenengo hiruhilekoa; otsailak 5-martxoak 9. 2018ko bigarren hiruhilekoa; maiatzak 7-ekainak 8. 2018ko hirugarren hiruhilekoa; abuztuak 6-irailak 7. 2018ko laugarren hiruhilekoa; azaroak 5-abenduak 10.
- Ibilgailuak. Urtekoa; otsailak 21-apirilak 6.
- Ondasun higiezinak. Urtekoa; maiatzak 2-uztailak 2.
- Badoak. Urtekoa; ekainak 1-uztailak 13.
- Ekonomi jarduerak. Urtekoa; urriak 1-azaroak 12.