Dobera Euskara Elkarteak, Zinea Euskaraz! saioak berreskuratuko ditu hileko azken ostegunetan. Aurreko urtean hasi zuen ekimena. Hilabete bakarrean, hiru astetan segidan pantaila haundian pelikula bat euskeraz eta debalde ikusteko aukera eman izan du. Aurten, ordea, hilero emango du aukera, hileko azken ostegunero.
Patxo Telleriak zuzendutako pelikula
Aurreneko saioa gaur izango da; 18:30etan, Sandiusterrin, Patxo Telleriak zuzendutako Igelak ikusi ahal izango da.
Protagonista nagusia Pello, banku sukurtsal bateko zuzendaria, delitu ekonomikoengatik atxilotu dute. Bere nagusiak ere inplikatuta dauden arren, bakarrik utziko dute justiziaren aurrean. Salduta dagoela konturatzean, ihes egitea erabakiko du.
Dirurik eta dokumentaziorik gabe, familia eta lagunik gabe, Pellok bere identitatea ordezkatuko du, ezkutuan jarraitu ahal izateko.
Iragan faltsu horrekin eta patuaren kapritxo bategatik, erreza egingo zaio Pellori Desahuziatuen Elkarte batek okupaturiko etxe batean babesa topatzea.
Bere kide berrien konfiantza bereganatuko du, asmo bakar batekin: haien diruaz jabetu eta atzerrira alde egitea.