Lehia, intentsitatea, oreka... Denetik izan zuen igandeko partiduak, Berion; eta puntuak banatu zituzten azkenean, Santo Tomas Lizeoak eta Mundarrok (1-1), Erregional Preferenteen mailan. Ondo landutako berdinketa lortu zuten astigartarrek, kontrario zuzen baten zelaian.
Hasieratik izan zen borrokatua partidua, eta ondo zelairatu zen Mundarro, kontzentratuta: baloia ez zutenean hutsune gutxi utziz, eta erasoan min eginez.
Lan polita egin zuten moreek, 30garren minutura arte: korner batean huts egin, eta bakarrik errematatu zuen kontrario batek, area txikian, aurreneko gola egiteko. Gauzak berehala itzuli ziren bere onera, hala ere: handik bi minutura, bere atean sartu zuten gola donostiarrek, eta banakoarekin iritsi ziren atsedenera.
Bigarren zatian, berdintsu joan ziren gauzak, nekea sumatzen hasi ziren arte. Orduan, erotu egin zen partidua, eta hutsuneak agertu, baina emaitzak ez zuen aldaketarik izan, markagailuan.