Larunbatean euriak arnas pixka bat eman zuen, baina atzo berriz ere protagonista nagusi bilakatu zen. Honela, Ttarla Dantza Taldearen eta Inmakulada ikastetxearen konpartsek jasan behar izan zuten ibilbidean. Horrek ez zituen partaideak kikildu. Alderantziz, irten baino lehen «eguraldi antzeko edo okerragoarekin ere irten izan gara», zioen partaide batek. Eguraldi txarrari aurre egiteko modurik hoberena dantza eta salto egitea da eta horrelaxe egin zuten bi karrozek.
Aurretik, Inmakulada ikastetxearen baserria. Ikasle eta irakalseak animali eta baserritarrez mozorrotu ziren eta kolore ederra hartu zuten erdiguneko kaleek, Urbietatik hasi eta Plazaraino. Puri-purian dauden abesti guztiak dantzatu zituzten, eta Ttarla Dantza taldekoek gainera kolore berezia eman zioten Hernaniri. Lainoen margo grisa Sevillako eta sevillanen kolore bereziekin ordezkatu zuten. Eskuak astindu eta abestiak dioen bezela Sevillak kolore berezia du.
Arratsaldean musikaren txanda izan zen eta kaleak alaitzen txaranga eta Hernani Musika Eskola Publikoko trikitilariak ibili ziren.
Gaur berriz, egitaraua indartuta dator
Bihar, sardinaren ehorzketak itxi ohi du inauteria ofizialki, baina festaren azken eguna benetan gaur biziko da. Ekitaldi ugari daude programatuak: axeri dantza, zezen txiki eta poniak, kulkir haur jolasak, erraldoi eta buruhandiak, puzgarriak... izango dituzte gotzatzeko goizean hasi eta arratsalderarte. Hori bai, denak zerura begira jarriko dira, nahiz eta festa ez zapuztu.
GAURKO EGITARAUA
09:00: Diana. ‘Hernani’ Musika Eskola Publikoa.
10:00: Axeri Dantza gaztetxoentzat.
11:30: Haurrentzat poniak eta zezen txikiak Latsunbeberri auzoan.
12:00: Kulki haur jolasak Atsegindegin.
16:00: Erraldoi eta Buruhandiak. Kriskitiña dantza taldea eta ‘Hernani Musika Eskola Publikoko dultzaineroak.
17:00: Gaztetxoentzako puzgarriak Atsegindegin. 8 urtetik gora.