Martxan da txotx denboraldi berria, eta sagardo berriaren uztarekin batera, iritsi da Euskal Sagardoa jatorri deituraren bigarren uzta ere.
Astigarragako ostalariekin jarri dute zita gaur, jatorri deitura aurkezteko, eta beraien kezkak eta beharrak ezagutzeko. Gure Izarra elkartean izango da, goizeko 09:30etan hasi eta 10:45etara arte.
Bertan, Euskal Sagardoari buruzko azalpenak emango dizkiete, aurkeztuko diete zein material daukaten ostalariek eskura (botilak eustekoak, eskantziadoreak, pegatinak...), eta dastaketa txiki bat ere egingo dute, zenbait sagardotegitako Euskal Sagardoarekin.
Gainera, jaso nahi dituzte ostalarien inpresioak, kezkak, beharrak eta ideiak.
Gure Izarra elkartean aurkeztuko dute Euskal Sagardoa, gaur 09:30etan hasita.
Aurreko urtean abiatu zen Euskal Sagardoaren proiektua, eta dagoeneko 48 sagardotegi daude barruan; 13 berri sartu dira aurten. Tartean dira, Astigarragako 12 sagardotegi: Alorrenea, Astarbe, Bereziartua, Etxeberria, Gartziategi, Gurutzeta, Ipintza, Irigoien-Herrero, Larrarte, Lizeaga, Petritegi eta Zapiain. %100 bertako sagarrarekin egindako sagardoa da Euskal Sagardoa.