Pasa den astelehenean ireki zen txotx denboraldia Gurutzeta sagardotegian eta orain kupelak jendearen zain daude. Aurtengo sagardoak duen zaporea dastatu daiteke ahoan. Egoitz Zapianek nabarmendu zuen «orekatua» izango dela sagardoa. «Aurreko urteetan baino kolore argiagoa duen sagardoa da».
25garren urteurreneko txotx irekiera ekitaldia
Ekitaldia berezia izan zen 25garren urteurrena ospatzen baitzen eta urte guzti horietan protagonista izan ziren pertsonai ezagun guztiak gonbidatu ziren. Eta noski, aurtengo protagonista; Alberto Iñurrategi mendizalea. Dantzak, musika sagarrondo landaketa, oroigarriak, komunikabide ugari... baina «Gure Sagardo Berria» ohiuaren zai denak.
Txotx Berri Herrikoia indartzen
Aurreko urtean lehen aldiz txotx herrikoiaren ibilbidea hasi zen, betiko txotx irekiera entzutetsuari jarraipena emateko. Herritarrek ere parte hartzeko modua bilatu nahi zen eta hortik sortu zuen Udalak sagardogileen laguntzarekin.
Irekierak herritar guztiei zuzendutako berrikuntzak uztartu nahi zituen betiko irekiera erakundeei soilik bait zegoen bideratua, eta «herritar bakoitza da garrantzitsua sagardoaren kulturaren transmisioan eta sustapenean» zioten Udaletik.
Beraz, aurten jarraipena izan du bigarren urtez Txotx Berri Herrikoiak, Murgia Jauregian, Astigarragako sagardotegi eta sagardogile ezberdinekin. Udaleko ordezkariek ere parte hartu zuten.
2018ko berrikuntza berriz, tabernarien parte hartzea izan zen. Astigarragako tabernek sagardo berria eskaini zuten arratsaldean zehar.
Pintxo eta sagardo dastaketa
Hasteko familientzako bakailo tortila tailerra egon zen bi txandetan. Ondoren eta bi ordu luzez, txotx herrikoia antolatu zen Murgia Jauregian. Herritarrei irekitako pintxo eta sagardo dastaketaz gozatu zuten haur, gazte, heldu eta adinekoek Norberto Almandoz Musika Eskolako trikitilariek girotuta. Dastaketa amaitu baino lehen argazki herrikoia atera zen.