EH BILDUK abenduaren 19an, prentsa bitartez jakin omen zuen Aldundiak Astigarraga eta Martuteneko 27garren poligonoa lotuko dituen ia kilometro bateko errepidea egiteko proiektua idatziko duela. EH Bilduren ustez «onartezina» da horrelako egitasmo baten berri lehen aldiz prentsa bitartez jaso behar izatea. «EAJren ereduaren beste adibide bat da. Gainera inguruko bizilagun eta lur-jabe kaltetuak ere prentsaren bitartez ohartu ziren».
EH Bilduren esanetan «prentsa oharrean, Astigarraga eta Donostiako Udalek egindako eskaerei erantzuten zien egitasmoa zela adierazten zen. Nola liteke Astigarragako Udalak eskaera bat egin izana eta oposizioak eta herritar kaltetuak horren berri ez izatea? Orain arte gaia ez da inon aipatu. EAJren gardentasun eta partehartze falta jasangaitza da».
EH Bilduk dio «erabateko gardentasun falta honi aurre egiteko, abenduaren 27an hainbat galdera luzatu zizkion Udal Gobernuari. Erantzuna urtarrilaren 3an iritsi zen, baina erantzunak zerbait argitu beharrean, zalantza, kezka eta harridura gehiago sorrarazi dizkio EH Bilduri».
EH Bilduk Astigarragako Udalak bide hau egiteko eskaerarik egin zuen galdetu zuen eta «Udal Gobernuak ezetz erantzun zuen. Enegarren aldiz, gezurra EAJren hitzetan. Ondoren plenoan berdina galdetuta, Udal Gobernuak eskaera hori egin zuela onartu zuen. Zein EAJ sinetsi behar da?».
«Obrari zenbateko aurrekontua aurreikusten zaion, errepidea noren jabegokoa izango den (Aldundiarena edo Astigarraga eta Donostiako Udalena), Astigarragako Udalak obra egiteko dirua jarri beharko ote duen, errepide berri honek herriko sarrerako biribilguneko trafikoan izango duen eragina aztertu den eta errepide berriaren inguruko bizilagunak informatu diren ez zekitela erantzun zuten EAJko kideak» adierazi du Bilduk prentsa oharrean eta onartezintzat jotzen dute. «Udal Gobernua gezurretan ari da oposizioari informazioa ukatzen ala proiektuaren inguruan ez daki ezer ere ez. Udal ordezkarien arduragabekeria inoiz imajina ezin zitekeen mailetaraino iritsi da. Astigarragako Alkatea berria aurkezteko prentsaurreko publikoan pozik azaldu zen baina ez daki errepide honen inguruan ezer ere ez. Astigartarrak lotsarazi ditu berriz ere».
«Lotura berria: soluzioa edo arazoa lekuz aldatzea?»
EH Bildu jakitun da Ubarburu poligonoak (27garren poligonoak) trafiko arazoak dituela baina aurkeztutako loturaren soluzioak kezka ugari sorrarazten dizkio. «Batetik, motordun ibilgailuentzako soluzioa bakarrik proposatzen da eta bizikletak (bidegorriak) eta oinezkoak ahazten dira. Bestetik, dagoeneko oso zigortua dagoen landa eremuari beste astindu bat ematen zaio. Santiagomendiko Paisaia babesten duten bitartean, Txoritokietako magala (kamioi aparkalekua), Urumeako ibarra (AHT) eta Petritegi bailarako (lotura berria) paisaiak suntsitzeko hautua egin dute gorritu gabe eta EH Bildurentzat hori hipokresia erakustaldi onartezina da».
Hala ere, EH Bilduri gehien kezkatzen diona lotura honek herri sarrerako biribilgunean «eragin dezaken trafiko areagotzea da. Lotura honen sarrera eta irteera guztiak Bidebitarteko biribilgunetik pasako dira eta ondorioz orain Donostiak duen arazoa Astigarragako herri sarrerara pasatzea ekar dezake. Dagoeneko, goizetan batik bat, ilara nabarmenak sortzen dira Astigarragatik irteteko eta zalantzarik ez dago lotura honek ez dituela gauzak hobetuko».
Oposizioko talde nagusiaren esanetan «EAJk plenoan onartu zuen Donostiako Udala dela bultzatzaile eta onuradun nagusia eta Astigarragak onurak aterako dituen zalantza dute. Hala ere, trafiko arazo larriak etor daitezkeela jakitun izanda ere, proiektua defendatzen jarraitzen dute. EH Bilduk ez du babestuko Donostiako udal barrutian dagoen arazoa, Astigarragako herriko sarrera eta irteera nagusira mugiaraztea. Baina Alkateak zein interes babesten ditu? Donostiakoak ala Astigarragakoak?»
EH Bilduk adierazten du «EAJk ez bezala», EH Bilduk ez diola itsu-itsuan baiezkoa emango lotura honi. «Horregatik, gutxienez, trafiko eta zarata azterketa independentea egitea eskatuko dio Astigarragako Udalari».