Larunbatean eman zitzaion hasiera, Hernaniko txotx denboraldiari; eta irekiera ekitaldiarekin, kritiko azaldu da Orain Hernani: «nahiz eta ahalegin guztiak egin ekitaldia antolatzen, berriro ere, ez da kontutan hartu emakumeen presentzia. Mingarria da Hernaniko txotx denboraldia iragartzeko argazkian, zortzi gizon eta emakume bakarra ikustea. Ez da onargarria, oraindik ere, ekitaldi ofizialetan parekotasunik ez izatea».
Bestalde, alderdiak salatu nahi izan du, badirudiela «biztanleen aurreko denboraldietako kexek, txotxaren inguruan, ez dutela aldaketarik sorraraziko, eta denak berdin» jarraituko duela.
«Gobernu Taldearen betebeharra da biztanleen eskubideetaz arduratzea»
Zentzu horretan, Orain Hernanik gaineratu du: «ez da eskubideen lehia, biztanleen eskubidea baizik, eta Gobernuaren betebeharra, ordenantza horiek kunplitzea. Atsedenerako eskubidea; kaletik ibiltzea 80 edo 6 urte edukita, lurrera erortzeko beldurrik gabe; etxeko portalean lasai sartzekoa, gure herria esfinter lasaien orgia ez bilakatzekoa... Eta Gobernu Taldearen betebeharra da eskubide horiek betetzeaz arduratzea».
Gainera, penaz hartu du EH Bilduk egitea gaiari buruzko inkestak herritarrei, eta ez Gobernu Taldeak berak, Udaletik; eta animatu du, emaitzak publiko egitera. «Garbi dago, txotxaren inpaktu ekonomikoa interesatze zaiola Gobernu Taldeari; izan ere, denon artean ordainduko dugun txostena eskatu du. Eta ezkerreko alderdiok ezin dugu eurotan kontabilizatzen diren balorazio neoliberalekin konformatu. Espero dugu hauek ere kontutan hartzea txostenean: sagardotegira datozenek Hernaniko paisaia eta ondarea baloratzen duten, etxera sagardo kaxak eramaten dituzten, hemengo gastronomia-produktuak ote diren, sortzen diren lanpostuak minijobs diren...».
«Pazientzia; Antonio Machadok zioen moduan; dena pasatzen da eta dena geratzen da», nabarmendu dute.