Gaur hasiko dute denboraldi berria, Hernaniko eta Ereñotzuko bolariek; eta ez nolanahiko zitarekin, gainera. Taldekako Txapelketaren kanporaketa izango da jokoan, Hernanin bertan; Benta Berriko bolatokian, Florida auzoan.
Goizean zein arratsaldean izango da tiraldia; 09:00etatik 11:00etara goizean, eta arratsaldean 16:00etatik 17:00etara.
Bertan izango dira, Hernaniko bi talde, CD Hernani eta Elur Txori; eta Ereñotzuko bat, Ur-Mia. Haiekin batera, ariko dira beste bost talde: Santa Kruz (Urnieta), Behar Zana A eta Behar Zana B (Amasa-Villabona), Txoritegi (Segura), eta Liztormendi (Zerain).
Segurako finalerako pasea, bi tiralditan
Taldekako Txapelketaren kanporaketan, bi tiraldi jokatuko ditu talde bakoitzak. Gaurkoa dute aurrenekoa, eta Olaberrian izango dute bigarrena, hernaniar eta ereñotzuarrek, datorren igandean. Beste zenbait taldek, berriz, Aian jokatuko dute aurreneko tiraldia, gaur.
Bi tiraldietako talde onenek, brila gehien botatzen dituztenek alegia, txapelketako finalerako pasea lortuko dute. Seguran izango da finala aurten, urtarrilaren 28an.