Zumaiarrek trainerua ateratzeko aukerarik ez daukatela eta, lanean hasi dira Hernaniko Arraun Elkartea eta Telmo Deunarena, neska arraunlariak arraun egin gabe geratu ez daitezen. Bide horretan, zumaiarrak Hernaniko Maialen trainerura gehitzeko lanean hasi dira bi taldeak.
Hala baieztatu dio Kronikari Xabier Zabala Hernaniko entrenatzaileak: «arraunarena mundu txikia da; Zumaiak ez zeukan jende nahikoa trainerua osatzeko, eta guk ere hainbat baja izan ditugu. Hori dela eta, zumaiar neska multzo batek Hernaniren izenean egingo du arraun».
Lan hori errazteko, gainera, «tarteka Zumaiara joaten ari gara entrenatzera».
Dena den, Xabier Zabala entrenatzaileak argitu duenez, «oraindik goiz da; momentuz horrela ari gara entrenatzen, baina ekainera arte ez dakigu zer-nolako mugimenduak egingo diren».
Batel liga, bihar hasita
Bitartean, entrenamendu eta beste hainbat konpetizioekin jarraituko dute bertako arraunlariek. Hala bada, bihar hasiko dute Gipuzkoako Batel Liga, eta bertan, ederki ordezkatuta egongo da Hernani. Trintxerpen izango dute aurreneko zita, goizeko 10:30etan hasita; aurretik, ordezkarien bilera izango dute, ordu eta erdi lehenago, 09:00etan.
Esan bezala, ordezkaritza zabala bidaliko du Hernanik, maila gehienetan. Hain justu, maila absolutuan, kadeteetan, infantiletan eta promesetan lehiatuko dira hernaniarrak. Gainera, generoari erreparatuz gero, ordezkaritza hori guztiz orekatua egongo da, izan ere, hiru batel ontziratuko dituzte neskek, eta beste hiru, mutilek .