Azkenean, errealitate bihurtu dela dirudi. Hurrengo ikasturtean irekiko ditu ateak Elias Querejeta Zine Eskolak Tabakaleran, eta horretarako izena eman daiteke dagoeneko. Maiatzaren 31ra arte izango da aukera aurrematrikula egiteko, www.zine-eskola.eus web orrian. Aurreneko ikasturtea Donostiako Zinemaldiaren 66garren edizioarekin batera abiaraziko da.
2018-2019 ikasturtetik aurrera, hiru graduondoko eskainiko dituzte: artxiboa, komisariotza eta sorkuntza. Matrikularen prezioa 3.500 eurokoa izango da, pertsonako.
Hala jakinarazi zuten aurreko astean, Denis Itxaso Kultura diputatuak eta Carlos Muguirok, Elias Querejeta Zine Eskola berriaren zuzendariak.
Espezialitateko, 15 ikasle
Aurreko astean egindako instalazioen aurkezpenean azaldu zituzten matrikulazio-epearen nondik norakoak Itxasok eta Muguirok. Hasiera batean, «ikasketa-plana goi mailako unibertsitate ikasketak egin dituzten ikasleentzat dago pentsatuta», baina azaldu dute «salbuespen gisa aztertuko da zine arloan esperientzia egiaztatua daukate ikaslegaien kasua». Izena eman dutenen artean banatuko dira espezialitateko egongo diren 15 plazak.
Eskola, Tabakalerako egoitzan
Dena prest daukate, beraz, Tabakalerako egoitzak Elias Querejeta Zine Eskola hartu dezan: «Eskolaren espazioa Tabakalerako lehenengo solairuan kokatzen da. 539 metro karratuko azalera du, hainbat espaziotan banatuta. Eskolak emateko hiru ikasgela ditu: ikasgela nagusi bat, non ikasle guztiak sartzen diren, eta beste bi ikasgela misto, erabilera anitzekoak, eskolak emateko, taldean lan egiteko eta bideo eta audio postprodukziorako erabiliko direnak. Hiru laborategi ere baditu, ekipamendu analogiko eta digitalaz hornituak», azaldu zuten aurreko astean.