Asteburu potoloa izango dute pelotari hernaniarrek, gaurtik hasi eta igandera arte. Hainbat txapelketa garrantzitsutan ariko dira, torneo ofizialak zein pribatuak.
Pribatuetako bat, Euskal Herriko Torneo Nazionala izango da. Lea Artibai taldeari irabazi zion Hernanik, final zortzirenetan (2-1). Paul Ojuel Okamikari nagusitu zitzaion aurrena lau t’erdian (18-3), eta Markel Lizeagak buruz burukoan irabazi zion gero, Arrizabalagari (18-10). Dena erabakita, galdu egin zuten Iñigo Urkizuk eta Eneko Aizpitartek, Uriona eta Uriondoren kontra (13-22).
Txapelketan aurrera eginda, final laurdenetan ariko da Hernani, igandean; arratsaldeko 17:00etan, Idiazabalen.
Eta aurrean, Tolosa izango dute, kontrario zaila: «horregatik, Hernaniko pelotazale guztiei eskatu diegu laguntza, bertara joan eta animatzeko», adierazi dute pelota elkartetik.
Hernanik aldaketa bakarra egingo du, kanporaketa honetarako: Ioritz Arrieta ariko da Aizpitarterekin, Urkizuren partez. Beste bietan, Ojuelek eta Lizeagak jokatuko dute.
Tolosaren kontra, Ojuel ariko da lau t’erdian, Lizeaga buruz buru, eta Arrieta eta Aizpitarte binaka.
Beste hiru txapelketa martxan, asteburuan
Txapelketa publikoen artean, berriz, hiru hasiko dira asteburu honetan: Euskal Herriko txapelketa batetik, Hernaniko bi bikote izango direla nagusien 1go mailan; Gipuzkoako errendimendukoa bestetik, 11 talde hernaniarrekin (5 alebinetan eta 6 infantiletan); eta Udaberri torneoa azkenik, lau talde hernaniarrekin (kadeteetan bat, jubeniletan bi eta nagusietan beste bat). Hiru txapelketa horietan, gaur bertan jokatuko dira partiduetako batzuk: Urkizu-Labaka 19:00etan Galdakaon; Arruti-Martin Lezon 18:15etan; eta Gorrotxategi-Urdangarin 18:30etan Andoainen.
Garrantzitsua izango da, igandean Ojuelek eta Aizpitartek Hernanin jokatuko dutena, Euskal Herrikoan. Oiarpeko Ugalde anaien kontra jokatuko dute, 17:00etan.