«Gure inguruko enpresei laguntzen jarraitzeko asmoz», beste bi sektorerekiko interesa erakutsi du orain Hernaniko EAJ-PNVk; «bi sektore oso garrantzitsu herriarentzat: sagardotegiak eta ostalaritza establezimenduak». Eta helburua ere garbi dauka: «batak besteari lagunduz, elkarlanean, beraien emaitzen kontua hobetu nahi dugu», adierazi dute.
Azaldu dutenez, aurrena leihoak fabrikatzen dituzten enpresekin egin zuten bezala, eta gero moto elektrikoen beste enpresa batekin, oraingoan sagardotegiak eta ostalaritza babesten saiatuko dira: «asmoa da, nahi duten sagardotegi eta ostalaritza establezimendu guztiekin, kontsumo elektriko bolumen interesgarri bat biltzea, gero enpresa elektrikoei aurkezteko, eta prezioak hobetu ahal izateko. Guk nahi dugun bakarra da, elkarlan edo kolaborazio hori erraztu eta lortzen lagundu; eta fruituak ematen baditu, komerzializatzaile batek azalduko dizkie eman beharreko pausoak, interesatuei», jakinarazi dute alderdi jeltzaletik.
EAJrekin zuzenean, Berriak elkartearekin edo telefonoz, interesa daukatenek
Andoni Amonarraizek, EAJren bozeramaileak, azaldu du sagardotegiekin harremanetan EAJtik bertatik ari direla jartzen zuzenean; eta ostalaritza establezimenduei informatu eta interesa daukaten ezagutzeko, Berriak elkartearekin ari dira elkarlanean.
Baina Berriak elkartekoak ez direnek ere, parte hartu dezakete. Nahikoa dute telefonoz deitzea, zenbaki honetara: 943 33 70 12. Bertan emango diete informazio guztia.
Hasitako bidearekin pozik azaldu dira alderdi jeltzalean: «badirudi etorkizun haundiko ideia izan daitekeela, eta garbi dago, helburua lortuz gero, zuzenean hobetuko duela enpresa horien emaitzen kontua; gure inguruko sagardotegi eta ostalaritza establezimenduena, alegia», nabarmendu dute.
Enpresen jarduera eta lan baldintzak hobetzea, eta enplegua sustatzea, ardatz
Bukatzeko, EAJk ziurtatu du, prentsa oharrean, lanean jarraituko duela bide horretan, hiru ardatzekin: «saiatuko gara gure inguruko enpresei laguntzen, beraien jarduera hobetzeko; langileen lan-baldintzak hobetzeko; eta baita gure herrian enplegua sustatzeko ere».