Bihar jarriko dute martxan, Hernaniko Udal Liburutegian, Irakurketa Kluba. Hilero egingo dute saio bana, eta biharkoa izango da aurrenekoa. Arratsaldeko 17:30etan hasiko da, eta ez 17:00etan, kultur agendan azaldu den bezala. Jakinarazi dute, bestalde, Txiki Txokoa itxita egongo dela, saioak iraun bitartean.
Bularretik Mintzora egitasmoaren baitan abiatu dute Irakurketa Kluba, eta bertan, 3-5 urteko haurrek eta beraien gurasoek, elkarrekin hartuko dute parte. Maria Garcia Laderok gidatuta, bi helburu izango dituzte saioek: gozatzeko une bat sortzea, ipuin, kantu, olerki eta hitz jolasekin; eta gurasoei prestakuntza ematea kontaketarako. Horretarako, haurrek eta gurasoek, ekimen desberdinak burutuko dituzte elkarrekin: irakurketa ozenak, liburu aurkezpenak, liburuei buruzko komentarioak...
Plaza libreak, oraindik
Irakurketa Klubaren saioetan parte hartzeko, izena eman behar da aurrez, plazak mugatuak direlako. 10 guraso eta haurrentzako tokia dago, eta oraindik 7 plaza geratzen dira libre. Apuntatzeko, liburutegira jo behar da.
Literatur solasaldia, gaur
Biharko saioaren aurretik, beste zita bat ere badaukate Udal Liburutegian, literatura zaleek. Izan ere, urteko aurreneko literatur solasaldia egingo dute gaur, gaztelaniaz, arratsaldeko 19:30etan hasita. Sergio del Molinoren La España vacía liburuari buruz ariko dira, Amaia Garciak gidatuta.
Euskerazko aurreneko literatur solasaldia, berriz, datorren asteartean izango da, urtarrilaren 16an. Gaurkoaren ordu berean, arratsaldeko 19:30etan hasita, Urt Zubiaurreren Izenik gabeko lurrak liburua izango dute hizpide. Ane Mayozek gidatuko du saioa.