Finalen asteburua izan da pasa dena, pelotari hernaniarrentzat. Herrian bertan, txikienak izan dira protagonista, Eguberritako Txapelketa azkarra jokatu baitute, Gabonetako asteburuetan; eta azkeneko honetan, hain justu, finalak.
Igande goizean izan ziren, eta semifinalekin ekin zioten. Benjaminetan, Danel Manterolak irabazi zion Oier Maciciorri (16-6); eta Joanes Usabiagak, Manex Alberdiri (16-10). Eta alebinetan, Ianitz Gorrotxategik 16-6 irabazi zion, Manex Alberdiri; eta Oier Azpeitiak 16-4, Ekhi Manterolari.
Segidan jokatu zituzten finalak, eta Manterolak 16-11 irabazi zion Usabiagari, benjaminen txapela janzteko. Maciciorrek irabazi zuen 16-14, hirugarren posturako lehian. Eta alebinetan, Gorrotxategik jantzi zuen txapela, Azpeitia 16-10 menderatuta. Hirugarren, Goikoetxea izan zen (16-7).
Arrieta eta Lizeaga ezinean, Altzako Torneoko finalean
Baina nagusiek ere bazeukaten finalik asteburuan; txapelaren bila joan ziren Ioritz Arrieta eta Markel Lizeaga, Altzako Torneoko finalera. Baina ezin izan zioten erantzun, Santxo usurbildarraren eta Santxez astigartarraren nagusitasunari, eta 9-22 galdu zuten. Gripeak jota jokatu zuen Lizeagak, eta Santxezek dominatu zuen, baita Santxok bikain errematatzeko aprobetxatu ere. yy