Beste urte batez, Pelota Eskolako Txapelketa jokatu dute Hernaniko pelotari gazteenek. Aurtengoak, gaur izango du bere final haundia. Goizeko 10:30etan hasita, frontoian elkartuko dira eta orduan hasiko dituzte finalerdiak.
Bi mailetako zortzi jokalari lehiatuko dira. Aurrena: benjaminetan, Danel Manterola Oier Maciciorren aurka, eta Joanes Usabiaga Manex Alberdiren kontra; eta alebinetan, Oier Azpeitia Ekhi Garmendiaren kontra aurrez aurre, eta gero, Ianitz Gorrotxategi Unax Goikotxearen aurka.
Hain zuzen, zortzi hauek dira hasierako 36 pelotarietatik finalerdietara pasa direnak.
Eguerdiko 12:00etan hasiko dute Altzako Txapelketako finala Ioritz Arrietak eta Markel Lizeagak.
Taldeko argazkia, tartean
Finalerdiak bukatuta, goizeko 11:30ak aldera jarri dute zita denboraldi honetako taldeko argazkia ateratzeko. Frontoian elkartuko dira bai jokalari eta baita entrenatzaileak ere, argazki erraldoian.
Jarraian, finalen aurretik, alebin federatuen arteko lagunarteko norgehiagoka izango da, binaka: Aiur Elizazu eta Enaitz Artola lehiatuko dira Auritz Txintxurreta eta Xuban Iturberen kontra.
Bukatzeko, horren ondoren jokatuko dituzte hirugarren eta laugarren postuak finalerdietako galtzaileek, eta final haundia, irabazleek.
Arrieta eta Lizeaga, Altzan
Bitartean, Altzan izango dira Ioritz Arrieta eta Markel Lizeaga seniorrak Altzako Txapelketaren finalean. Txapela jokatuko dute eguerdiko 12:00etatik aurrera, Pagazpeko Santxo eta Mundarroko Santxezen kontra: jantziko al dute hernaniarrek urteko aurreneko txapela? Lehia oso berdindua egongo da, beraz, ikuskizuna ziurtatuta egongo da Altzako frontoian.