Argitaratu berri du Mendiriz Mendi elkarteak 2018rako aurreikusi duen egutegia, eta bertan dira aste honetan izango diren aurreneko zitak: eski ikastaroa, asteburu osoan zehar, eta helduen aurreneko irtenaldia, Elizondo-Urkiaga mendatera, igande honetan.
Horren aurretik, beste hitzordu bat ere zehaztuta daukate; bihar bilera deitu dute iraupen eskiko eta eski alpinoko ikastaroa egin nahi dutenekin. Iluntzeko 20:00etan elkartuko dira, Mendiriz Mendiko lokalean (Iturregi plaza, z/g).
Igandeko irteeran parte hartzeko izena eman beharko da osteguna baino lehen.
Irteera, igandean
Baina eski ikastaroarena ez da Mendiriz Mendik antolatutako irteera bakarra. Izan ere, igande honetan, hilaren 14an, Piriniotako zeharkaldiaren GR-11 3.etapa egingo dute, Elizondo-Urkiaga mendatea zeharkatzen duena, hain zuzen. Atsegindegitik abiatuko dira, goizeko 07:30etan.
Parte hartu ahal izateko, izena eman beharko da osteguna baino lehen, Mendiriz Mendiren lokalean. Prezioa: bazkideek, 13 euro; ez bazkideek, 17 euro.