Kutxa Ekoguneak abenduaren 16an martxan jarri zuen Jostailuen Trukegunea bere azkeneko egunetara iristen ari da; hain zuzen, astelehenean, hilaren 8an itxiko dute. Orain arte, «iazko emaitzak hirukoiztea lortu du», eta itxi arte, «emaitzak oraindik gehiago haunditzea espero da», azaldu du Kutxa Ekoguneak.
Denetarik utzi dutela adierazi dute: liburuak, musika instrumentuak, puzzleak, panpinak, mozorroak, pelutxeak, etab.
Berrerabilpena erraztea, helburu
Asmo bikoitza dauka egitasmoak. Alde batetik, «haurrei trukean oinarritutako esperientzia zoragarri bat eskaintzea; eta bestetik, «Gabonetan opari moduan jasotzen dituzten jolasak berrerabiliak izateko aukera erraztea».
Egun hauetan, «gauzak doan jasotzeko ohitura falta» somatzen ari direla diote. Eta azpimarratu dute «balio berdina duela hartzeak eta emateak».
Hori dela eta, herritarrak animatu dituzte jostailuak utzi edota hartzera, «betiere uzten den hura erabiltzeko egoera onean dagoela ziurtatuz. Jasotakoa, utzitako gure seme-alaben jostailuak erabiltzen genituen bezala tratatzeko konpromisoz».