«EAJ eta PSE-EE Astigarragako interesak babestu beharrean, Diputazioko ordezkari moduan aritu ziren Garraio Hiria babesten azaroko plenoan». EH Bilduk Garraio Hiria behin-betiko baztertzeko mozio bat aurkeztu zuen. Bertan, probisionalki bada ere, «beste alternatiba jasangarriagoa (nekazaritza ekologikoa…)» eskatzen zuen EH Bilduk, «lur horien erabilera nekazariei uztea eta baita Donostiako Udalari, eremu horietan egon diren desjabetzeengatik jaso duen dirua astigartarroi itzultzeko ere».
Oposizioko alderdiaren esanetan «EAJ prentsan bazterrak nahasten ibili da, bere benetako posizioa azaldu beharrean, EH Bildu erasotu nahian. Plenoan, beste behin, argi geratu zen: EAJk eta PSE-EEk Garraio Hiria babesten dute eta EH Bildu da aurka dagoen bakarra. Aurka Astigarragari ez diolako ezer onik ekarriko, herriko paisaia are gehiago txikituko duelako, inguruetan zarata arazoak sor ditzakeelako, eremuak alternatiba jasangarriagoak izan dezakelako»…
Aurreko legealdian Astigarragako Udala EH Bilduren eskutik Garraio Hiriaren aurka agertu zen. «Oraingoan aldiz, EAJ eta PSE-EEren eskutik, Garraio Hiriaren proiektuak kolaboratzaile berria du: Astigarragako Udala». EH Bildurentzat oso berri txarra baina ez harritzekoa, «biak beti egon baitira hormigoi eta makroproiektuen alde».
EAJk Garraio Hiriaren aldeko argudioak emateko garaian beste gai batekin nahastu du, EH Bilduren ustez. «Astigarragak kamioien aparkatzeko tokiekin arazoak baldin baditu, Astigarragari dagokio hori konpontzea, Astigarragako Udalak baitu herri barneko trafikoaren eskumena. Beraz, arduragabekeria da Aldundiari hau konpon dezala eskatzea. Jarrera honek ez du EH Bildu batere harritu, ardurak propioak sahiestu eta ardurak bizilagunari eskatzeko iaioa den gobernua baitugu Astigarragan».
Gainera, EH Bilduk EAJren inkoherentzia salatu zuen: «nola da posible Santiagomendiko Paisaia berreskuratzeko lana hauspotzea eta herriko beste paisaia batek jasango duen erasoaren aurrean prestutasuna adieraztea? Lotsik ez. Herritarrak lasaiago uzteko, Aldundiari Ingurumen azterketa egiteko eskatuko omen dio baina EH Bilduk itxurakeriak alde batera utzi eta gogorarazi zion azterketa hori beharrezkoa zela, Ingurumen eta Hirigintza legeek hala aurreikusiten dutelako».
Proiektua garatze prozesuan dago eta oraindik ibilbide luzea izango du «baina orain jakina da Garraio Hiriak Astigarragako Udalean kolaboratzaile finak dituela. Beraz, proiektuari aurka egiteko estrategiak egokitu egin beharko dira ahalik eta eraginkorrenak izateko. Astigarragako EH Bildu horretan arituko da buru-belarri».
«Ergobiako zubia berreskuratzeko eskaera EAJren babesik gabe»
EH Bilduren beste mozio batean, Eusko Jaurlaritzak babestutako Ergobiako zubia berreskuratzeko konpromisoa hartzea eskatu zitzaien URA, Añarbe, Eusko Jaurlaritzako eta Diputazioko Kultura Sailei eta Astigarragako Udalari. Bestetik, uholdeen aurkako lanak berehala hasteko eskaera ere luzatzen zen mozioan.
«URA, Ergobiako zubitik Akarregira doan eremuan uholdeei aurre egiteko proiektua lantzen ari denez, EH Bilduk inoiz baino aproposagoa ikusi zuen Astigarragari dagokiona eskatzeko aukera. Bi gai lantzeko eskaera luzatu zuen EH Bilduk: batetik Ergobiako zubi babestua arkitektonikoki eta kulturalki berreskuratu eta behar duen balioan jartzea eta bestetik, Ergobia-Akarregi eremuan uholdeen aurkako obra lanak berehala martxan jartzea».
Gaur egun, zubiaren gainetik Añarberen sareak igarotzen dira eta hodi horiek «hormigoizko estruktura handi eta zatar batez daude babestuak eta honek zubiaren itxura erabat baldintzatzen dute».
Horregatik guztiagatik, EH Bilduk «aukera hau pasatzen utzi ezin dela ohartuta, mozioa aurkeztu zuen eta azaroko plenoan onartua izan zen EH Bildu eta PSE-EEren aldeko botoekin. EAJ aldiz, azalpen sinesgarririk eman gabe abstenitu egin zen. Horrelako aukerak aprobetxatu ezean, zaila edo ezinezkoa izango da Ergobiako zubiari merezi zaion ohorea ematea».
Prentsa oharrean EH Bilduk adierazi duenez. «EAJ Ergobiako zubiaren gaia ekiditen saiatu da hasiera hasieratik. Abuztutik zegoen gaia mahai gainean eta plenoa baina lehen, Bozeramaile Batzordean mozioaren eztabaida atzeratzen saiatu zen. Ezinezkoa zen tramitazioa atzeratzea, legeak dion bezala hiru hilabetera landu beharra dagoelako gaia eta horregatik jorratu zen azaroko plenoan. Plenoan, aldiz, puntu guztietan abstenitu egin zen EAJ. Eusko Alderdi Jeltzalea ez zen gai izan URAri uholdeen aurkako lanak ahalik eta azkarren egin ditzan eskatzea babesteko ere». yy