Jarrera batzuekin «kezkatuta» azaldu da Kaxko Elkartea, auzoan egindako hobekuntza batzuek jasandakoaren ondoren. Eta horiek azaltzeko, prentsa-oharra zabaldu dute.
Gaztain-txabola eta lorategiak, kaltetuta
Auzolanean egindako hainbat lan aipatzen ditu Kaxko Elkarteak oharrean. Aurrenekoak, azkeneko hilabetean hobetutako lorategiekin dauka zerikusia: «landareak eraman dituzte, baita zuhaixka batzuk sustraitik atera ere. Eta ondoren, metro batzuetara bota, edo zanpatu egin dituzte». Elkartearen ustez, horrelako jarrerekin «bizilagunok egin dugun ahalegina ez dira errespetatzen ari».
Bigarrenak, aldiz, duela aste batzuk berritutako gaztain-txabolarekin: «auzolanean egin da, baita ere, gaztain-txabolaren muntaia eta instalazioa, urtero bezala, gaztain-saltzaileak negu honetan ere gaztainak saldu zitzan. Presaz egin zenez, behin betiko apainketa egin gabe zegoen, izan ere, herriko artistek egiteko zain gaude», azaldu dute. Honetan, «pintada aldarrikatzailea» egin dutela salatu dute; eta «mesedez» eskatu diete egileei «zikindutako egurra garbitu eta konpondu dezatela».
Era berean, adierazi dute: «Kaxkoko fatxada eta paretetan pintada aldarrikatzaileak egin dituzte berriro ere. Uste genuen adostu zela ez zirela Kaxkoko paretak zikinduko, Kaxko Historikoaren berreskurapenarengatik babestuta daudelako». Eta onartu dute, aurten hirutan garbitu behar izan dituela Udalak: «hareharria izanik, dakarren hondatzearekin». Berriro ez errepikatzeko «neurriak» eskatu dizkiote Udalari.
Azkenik, gogorarazi dute «auzolanean egin diren lan hauek Udalaren baimenarekin» egin direla, eta bere laguntza ekonomikoarekin».