Duela astebete iragarri zuen Sagardoaren Lurraldeak hilaren 15ean, Gurutzeta Sagardotegian izango dela 2018ko txotx denboraldiaren hasiera, eta orain, beste xehetasun baten berri eman du. Alberto Iñurrategi eskalatzaile eta mendizalea izango da aurtengo protagonista nagusia, eta beraz, berak irekiko du aurreneko kupela «Gure Sagardo Berria» oihukatuz.
Hilaren 15ean izango da txotx denboraldiaren hasiera, Astigarragan.
Prentsaurrekoa eta landaketa, aurretik
Baina horren aurretik, prentsaurrekoa eskainiko du Iñurrategik, sagardogileen eta erakunde publikoen ordezkariekin batera, Sagardo Etxean, eta bertan azalduko dira aurtengo denboraldiaren eta uztaren nondik norakoak. Eta ondoren, sagarrondoa landatuko du Sagardo Etxearen inguruko lurretan.
Handik, Gurutzeta Sagardotegira abiatuko dira, eta bertan dantzatuko dute sagar dantza eta soka dantza, musikarien erritmora. Orduan iritsiko da, azkenik, aurreneko kupela irekitzeko unea: «txootx!».