Gehiago itxaron gabe, gaur bertan izango dute aurreneko zita Hernaniko odol emaileek. Arratsaldeko 18:30etan hasi eta 20:30etara arte, anbulatorioan izango da aukera, odola emateko edota organo donante egiteko.
Eta Gabonak gabon, bertaratzeko deia luzatu diete herritarrei, Odol Emaileen Elkartetik. Ez alperrik, gainera. Izan ere, behera egin du odol emaileen kopuruak, azkeneko hilabete hauetan, eta suspertu egin nahi dute berriro.
2017ko udaran gora eta udazkenean behera
Bukatu berri den urteko datuei dagokienez, nabarmentzekoak dira estrakzio kopuruak izan dituen gorabeherak. Udaberrian oso exkax ibili ziren, 2016an baino 28 estrakzio gutxiagorekin: 40 apirilean, 44 maiatzan eta 52 ekainean. Baina ondo erantzun zioten hernaniarrek, Gipuzkoako Odol Emaileen Elkartearen deiari: erreserbak exkax zeuden, udaran erreserbak gutxitu egiten dira, eta odol beharra haunditu.
Eta gora egin zuen odol-emate kopuruak. Uztailean 66 lagunek eman zuten odola, abuztuan 64k, eta irailean 61ek; guztira, 2016an baino 25 odol emaile gehiago.
Baina aldiz, udazkenean kontrakoa gertatu da. Behera egin du odol-emate kopuruak berriro: 53 urrian, 56 azaroan eta 46 abenduan. Hiru hilabete horietan, 12 estrakzio gehiago izan ziren 2016an.