Ondo girotuta iritsi dira Gabonak Goizuetara! Aurreko asteburuko bi zitekin, bereziki. Batetik, turroi eta mazapanak egiten ikasi zuten, Azaro Kulturalaren barruan, Bidatz Barrenetxea hernaniarrak eskaini zuen tailerrarekin. Gustora asko aritu ziren, bertaratutako 9 herritarrak, Eskolako sukaldean saltsan; eta Cebank sukaldaritza-hostalaritza eskolako irakaslearen eskutik, ikasi zuten mazapanak, turroi gogorra eta turroi biguna nola egin.
Beraz, Gabonetako otorduetan, etxean egindako gozoak izango dituzte aurten zenbaitek, Goizuetan!
Eta kantarik ere ez da faltako, noski! Horretatik ere izan zuen, aurreko asteak: Umore Ona abesbatzak eta herriko gaztetxoek, Gabonetako emanaldia eskaini zuten elizan, eta afari baten bueltan borobildu zuten eguna.
Olentzerorekin, hiru zita
Gabon giro hori ikusita, desiatzen egonen da Olentzero, Goizuetara etortzeko! Bihar iritsiko da: arratsaldeko 18:30etan sartuko da herrian, eta Plazan edo frontoian eginen du geldialdia, haurrekin egoteko. Gutunak jaso, eta goxokiak banatuko dizkie.
Goizean, hala ere, Olentzero hartuta aterako dira kantuan Eskolako haurrak, 11:00ak aldera, DBHkoentzat dirua biltzeko; eta hamaiketakoa ere eginen dute elkarrekin. Arratsaldean, berriz, presoen aldeko Olentzeroa aterako da, 15:30-16:00ak aldera, eta arratsalde osoan zehar arituko dira kantuan. Olentzero iristean ere, kantuan eginen diote ongietorria.
Tailerrak, datorren astean
Datorren astean ere, izanen dituzte zitak, herrian. Eguberritako tailerrak eginen dituzte hiru egunez, haurrentzat: astearte eta asteazkenean Goizuetan, eta ostegunean Aranon. Goizeko 10:00etan hasi, eta 13:00etara arte izanen dira, hiru egunetan. Parte hartzeko, aurrez apuntatu behar zen.