urtea amaitzearekin batera esku pelota final desberdinak jokatuko dira gaur eta bihar. Hernaniar pelotariak ere izango dira protagonista horietako batzuetan. Azpimarragarria da Markel Lizegak jokatuko duen Gipuzkoako Txapelketako Finala nagusien mailan. Gaur, Tolosako Beotibarren, 11:30etatik aurrera, Intxurre taldeko Artola du aurkari finalean. Hernaniarrak jokatu dituen bost partiduak irabazita iritsi da finalera eta hautagai nagusia da txapela irabazteko, txapelketako sorpresa nagusia izan denaren kontra.
Tolosatik gertu, Villabonan, Antxon Pebet Torneoko finala jokatuko du beste hernaniara batek. Gaur, 18:30etan, Zezeagarekin batera, Urbieta I eta Aranguren izango dituzte aurkari. Finalera iristeko hiru kanporaketa gainditu behar izan dituzte.
Finalerako ez dago faboritorik. Bi aurrelariak afizionatuetan maila onean egonkortu diren pelotariak dira eta atzelariak, etorkizun oparoa izan dezaketen bi pelotari.
Gipuzkoako Trinkete Txapelketa
CD Hernaniko bi pelotarik konpromezu garrantzitsu dituzte asteburu honetan. Mailaz ez jeisteko partidua jokatuko du gaur Iñigo Labaka seniorrak 17:00etan Iruran. Azkoitiko Anduezaren aurka lehiatuko da; irabazleak mailari eutsiko dio eta partidu parekatua espero da.
Bihar, 12,00etan, Iruran, Garikoitz Arizmendi jubenilaren txanda izango da. Finalaurdenak izango ditu Azkoitiko Oteizaren aurka. Hernaniarrak ez du oraindik partidurik galdu txapelketa guztian zehar eta faborito da finalerdietara pasatzeko. Beste lau partidu ere jokatuko dituzte hernaniarrek, gaur eta bihar.