Badira urte batzuk, bakerotarrek futbola utzi zutela, zeinek lehenago zeinek beranduago, jokalari bezala behintzat.
Baina ez dirudi bakerotarren saga eten denik futbolean; alderantziz, bizi-bizirik dago berriro.
Oraingoan, Jon Bakero gaztea da protagonista izaten ari dena. Estatu Batuetako txapelketa unibertsitarioan ari da Jose Mari Bakeroren semea, eta ez maila apalean: jokalari onenaren saria irabazteko hiru finalisten artean dago, atzo arratsaldean bertan iragarri zutenez.
MAC Hermann Trophy saria da, unibertsitate mailan garrantzitsuena; urtarrilaren 5ean jakinarazituko dute irabazlea.
Erasoko jokalari onena, ACC konferentzian
Baina hori ez da Bakerok jaso duen errekonozimendu bakarra. AEBetako txapelketa unibertsitarioa, liga txikiagoez edo konferentziez osatua dago, eta Wake Forest unibertsitateko Demon Deacons taldearekin, ACC konferentzian ari da Bakero. Eta bera izendatu dute, konferentzia horretako erasoko jokalari onena, aurten: 23 partidutan, 16 gol sartu eta 14 asistentzia eman ditu.
Bere taldea izan da ACC ligako txapeldun, eta hori horrela, estatu mailakoa irabazteko kanporaketetan aritu dira. Final laurdenetan galdu dute.