Gabonetako egun bereziei, auzoko txikienek emango diete bizitasuna, Ereñotzun. Izan ere, beste urte batez, bi zita nagusi jarri dituzte, auzotar guztiei eskainiko dizkietenak.
Santo Tomas eguneko ospakizuna izango da aurrenekoa, ostegun goizean, abenduaren 21ean bertan. Txistorrada egingo dute Txirrita eskolako ikasle eta irakasleek, eta auzo guztiari luzatu diote gonbitea, txistor goxoa jatera gerturatzeko. Eta Gabon kanturik ere ez da faltako bertan! Modu horretan, giro ederrean egingo diote ongietorria, Gabonei.
Santo Tomas egunez, txistorrada egingo du Txirrita eskolak, auzotar guztientzat.
Eta Gabon kantek, nola ez, abenduaren 24an izango dute segida. Katiluzar guraso elkarteak antolatuta, kantuan aterako dira eskolako haurrak eta gurasoak, arratsaldean. Etxez etxe joango dira, trikitixa eta panderoen erritmora, Gabonetako doinuak eramatera.