Firma bilketa jarri dute martxan Goizuetan, eskatzeko «orain dauden erizain eta medikuak mantendu ditzatela, eta beraien lan baldintzak hobetu ditzatela». Izan ere, ohartarazi dute, 2017ko abenduaren 31n «kanporatu» egingo dituztela, herrian larrialdietarako dauden erizainak: «beraien kontratua bukatutzat emanen zaie, egiaz emanen ez diren lan hobekuntzak aitzakia hartuta. Honen ondorioz, ez dakigu beste erizainik etorriko den, edota etortzen direnek zein baldintzatan eginen duten», azaldu dute, sinadura bilketarako zabaldutako orrian.
Bertan diote, baita ere: «orain dela bi urte, herrian jasan genuen bi mediku eta bi erizainen alde egitea, pairatzen zituzten lan baldintza kaxkarrengatik. Osasunbideak eta Nafarroako Gobernuak, zer egin nahi dute gure herriko larrialdietako guneekin eta langileekin? Ohartzen direla herritarrok pairatzen ditugula ondorioak?».