Azken egunetan facebook bidez ari dira Esne Beltzako kideak, gaur eta biharko kontzertuen inguruko detaileak argitzen.
Izan ere, ez dira nolanahiko kontzertuak izango. Taldeak hamar urte bete dituela ospatzeko, Hamar urte lagun artean izenburupean bi kontzertu emango dituzte, gaur eta bihar, 22:30etan Biterin. Ez da sarrerarik geratzen.
Gonbidatu bereziak
Eta hain juxtu, lagun artean joko dute bi kontzertuetan; hau da, gonbidatu bereziak ariko dira Esne Beltzarekin jotzen.
Oraingoz esan dutenaren arabera, gaurko emanaldian Kukai dantza taldea, Patxuko, Glaukomako Juantxo edota Bad Sound Systemeko Moro igoko dira taula gainera.
Bihar, berriz, Kukai eta Patxuko berriro ikusteko aukera izango da, eta horrez gain, Fermin Muguruza eta Alaitz eta Maiderrek ere joko dute. Sorpresarik ez da faltako.