Musikak blaitzen du Hernani askotan, eta zer esanik ez, Gabonen bueltan. Gaurkoan, ‘Hernani’ Musika Eskola Publikoko ikasleek bi saio emango dituzte, eta horietako bat, berezia.
Gaztetxoenek, kalejira
Aurreneko zita arratsaldeko 17:00etan jarri dute, Plazan, kalejiran abiatzeko. Ikasle gaztetxoenek, Gabon doinuak kantatu eta joko dituzte, kaleetan barrena.
Olaizolak bultzatutako Eresoinkak, 80 urte
Bigarren zita, berriz, 19:30etan izango da, Milagrosan. Urtero bezala, musika eskolako Dakapo abesbatzak eta Leokadisti txistulari taldeak Eguberrietako kontzertua emango dute. Baina berezia izango da, aurtengoa.
Izan ere, Anitz musika elkarteak berreskuratutako Eresoinka taldea izango dute lagun. Aurten 80 urte betetzen dira, Gabriel Olaizola hernaniarrak, beste batzuekin batean, Eresoinka talde sonatua bultzatu zuela. Talde honek euskal kantu eta dantzak Europa eta Ameriketan barrena zabaldu zituen.
Horrela, gaurko emanaldiak lau zati izango ditu. Aurrenekoan, abesbatzak kantatuko du: Mary Mary; The First Noel; Rin rin; Kanpai soinu, zilar soinu; eta Halle, hallelujaj.
Segidan, txistulariak ariko dira: Eguberriko IV. alborada; Koledy eta Bizar zuri.
Elkarrekin ariko dira gero, txistulariak eta abesbatza, bi pieza jotzen: Aintza zeruan eta Gabonetako afari on bat.
Eta bukatzeko, Eresoinka txarangak, hainbat pieza ezagun joko ditu; Gabriel Olaizola hernaniarraren Haurtxoa sehaskan, esaterako, eta Itsasoa laino dago; Eusko gudariak; Ama begira zazu; eta hernaniarrak tartean dituen Huntza talde ezagunaren Aldapan gora doinu arrakastatsua ere eskainiko dute.
Denei, ukitu berezia emango die taldeak.