Herri osoan zehar zabalduko dira txistor jateak gaur, Santo Tomas egunez. Goiz Eguzki jubilatuen egoitzak, esaterako, goizeko 11:00etan hasiko du ospakizuna. Udazkeneko karta eta herri-jolasen sariak banatuko dituzte aurrena; ondoren, lau saski zozketatuko dituzte, bazkideen artean; eta segidan egingo dute txistorrada.
Herriko eskoletan ere, gaur bertan egingo dute festa. Inmakuladan, azoka jarriko dute 10:30etatik 12:00etara, barazki, fruta, pastel eta abarrekin. Ez da faltako txistorrarik, noski! Eta txerritxoaren eta saskiaren zozketarekin bukatuko dute.
Elizatxon ere jarriko dute azoka, 09:00etan. Altxorraren jolasa ere egingo dute, Olentzeroren bisita jaso, eta txistorra bokadilloak jan.
Olentzero eta Mari Domingiren bisita jasoko dute Langile ikastolakoek ere, Meaben; eta 12:00etan kalejira egingo dute. LH1ekoak, berriz, Elutxetara joango dira Olentzero eta Mari Domingiren bila, eta LH2koek egingo diete harrera Laubidietan. Txistorrada egingo dute gero, eguerdian.
Eta Ereñotzuko Txirrita eskolan ere ospatuko dute, goizean, auzotar guztiei bertaratzeko gonbitea luzatuta.
Gaztelekuak, aldiz, arratsaldean ospatuko du Santo Tomas eguna, 17:30etatik aurrera lokalean, Txistorra&Halal meriendarekin.
Eta San Joan Konpartsa Donostian egongo da gaur, Gipuzkoa Plazan taloak saltzen, joan den larunbatean Plaza Berrin azoka jarri ondoren.
Portu auzoan, larunbatean
Santo Tomas eguna datorren asteburuan ospatuko duenik ere izango da: Portu auzoan, larunbatean 12:00etan.