Ederki ari dira hernaniarrak, kros denboraldiaren hasiera honetan. Eta joan den asteburuan ere, erakutsi dute beraien maila, CD Hernaniko atletek, Ordiziako krosean emaitza ederrak lortuz, atzo.
Denetan nabarmenena, 20 urtez azpikoetan Anartz Artolak lortu zuen garaipena. Lasterketa bikaina egin zuen hernaniarrak, Oianguko zirkuitu aldapatsuan, hasieratik bukaerara aurreneko postuetan ibilita, irabazteko lehian.
Azkenean, 20:42 denboran osatu zuen 5,5 kilometroko ibilbidea, eta 11 segundura helmugaratu zen bigarrena, Julen Teran. Assehli Youness izan zen hirugarren, 30 segundura.
Baina beste emaitza aipagarririk ere lortu zuten atleta hernaniar gazteek. Esaterako, bosgarren postuan sailkatu zen Gorka Lopez de Arregi, 16 urtez azpikoetan.
San Silbestreak, edizio berezia aurten
Eta ez da lokatza izango, baina atleta horietako batzuk ariko dira, ziur, Wukroren aldeko San Silbestrean ere, abenduaren 31n. Edizio berezia izango da aurtengoa, eta CD Hernanirekin batera, Gazte Asanblada ere ariko da antolaketan.
Arratsaldeko 17:30etan hasiko da 8 urtetik beherakoena (300 metro), 17:45etan 8-13 urte bitartekoena (800 metro), eta 18:00etan lasterketa nagusia (4 km), 14 urtetik gorakoena.
Azken horretarako, zabalik dago izenematea, 8 euroan, www.kirolprobak.com webgunean edota Ibaimendin. Beste bietarako, egunean bertan izango da izenematea.