Koopfabrika ekintzailetza sozialerako programa da, 2015ean Kooperatzen izena zuena, eta 2017an egungo ereduan lehen adiz eskainia izan zena. Eskualdean hainbat sektoretako hamar proiektu ingururen sorreran eta kontsolidazioan bidelaguntza eskaini ondoren, 2018rako izen-ematea irekita dago.
Gipuzkoa osoko proiektuek dute izena emateko aukera eta 2018an lau eskualdetan eskainiko dituzte lan espazioak: Debagoienan, Beterri-Buruntzan, lehen aldiz Bidasoa-Txingudin eta Oarsoaldean.
Ekintzailetzari eduki sozial, kooperatibo eta eraldatzailea eman nahi dio KoopFabrikak, tokian tokiko sareen garrantzia abiapuntu hartuta.
Hiru profiletako jendea
Hiru profiletako jendeari zuzentzen zaio programa. Batetik, proiektu edo ideiaren bat lantzen edo martxan jarri nahian direnak. Bestetik, orain arte elkarte forman jardunean aritu arren, profesionalizatu edo beste era batera antolatu nahi duten taldeak. Eta azkenik, enpresen baitako barne-ekintzailetza proiektuei dimentsio sozialetik ekiteko asmoa dutenak.
Trebaketa eta tutoretza
Formakuntzan arlo teoriko komuna lantzeaz gain, ekintzailetza sozialerako tresnen erabilpenean trebatu, eta KoopFabrikatik irtendako proiektuei tutoretza eskainiko zaie garapen eta saretzerako.
Doakoa, baina plaza mugatuak
Programan parte hartzea doakoa da, baina plaza mugatuak daude. Datozen asteetan parte-hartzaileekin elkarrizketa fasea irekiko da. Horregatik, dei egin nahi diete interesatuei, KoopFabrikan izen emateko, koopfabrika.eus webgunean.
Beterri-Buruntzan, Olatukoop sareko kooperatibek dinamizatuko dute lurralde nodoa.
Twitter, Facebook eta Instagram sare sozialetan ere, proiektuaren egunerokoaren berri izateko aukera izango dute interesatuek.