ELA, LAB, CCOO eta UGT sindikatuek greba mugagabea iragarri dute heldu den abenduaren 19tik aurrera Gipuzkoako garbiketa eta zabor bilketaren alorrean, lan hitzarmenaren negoziazioaren alde. 1.200 langile inguru biltzen ditu sektoreak.
Hernanin grebaren eragina desberdina izango da beste herri askorekin alderatuta. Kale garbiketan aritzen diren langileek egingo dute greba, baina zabor bilketako langileek ez. Atez atekoa beste enpresa batek kudeatzen du eta bertako langileek ez dute grebarik egingo. Beraz, Hernanin eragina bestelakoa izango da, inguruko beste herriekin alderatuz.
Lan hitzarmenaren indarraldia 2015eko abenduan bukatu zen eta 1.200 langileri eragiten die. Ostegunean negoziazio mahaia bildu zen, baina ez ziren akordio batera iritsi nahiz eta aldeak gerturatu. Zerbitzu minimoetarako ere ez dira ados jarri.
Topaketa gehiago izango dira, akordio bat erdiesteko asmoarekin asteartea iritsi baino lehen, baina langileek bi urte eman dituzte negoziazioan, «eta grebarako prest daude», berretsi zuen ELAko Jose Luis Ugartek.
Gehitu duenez, kaltetuak «udalak eta erabiltzaileak» izango dira; izan ere, Gabonetan kontsumoa areagotzen da, eta, hortaz, zabor gehiago sortzen da.