Maila politean dabiltza pilotari goizuetarrak, azkeneko asteotan; eta jantzi dute txapelarik ere!
Xanet Apezetxeak gazteak lortu zuen txapela preziatua, aurreko asteburuan, Ander Pagola beratarrarekin bikotea osatuta; 18-12 nagusitu ziren finalean.
Baina etxeko txapelketan ere, ondo ari dira goizuetarrak, Umore Ona esku pilota txapelketan. Azkeneko aste honetan, jokatutako bost partiduetatik hiru irabazi dituzte. Larunbatean, 18-17 irabazi zuten Salaberria eta Ruiz benjaminek. Igandean, berriz, 18-13 nagusitu ziren Legarreta eta Elizegi alebinak; baina galdu egin zuten Aizkorbe eta Apezetxea jubenilek (17-22). Hala ere, errebantxa hartu zuten asteazkenean, eta Santamaria eta Telletxearen kontrakoa irabazi zuten (22-13). Egun horretan, Salaberriak eta Ruizek jaso zuten porrota (5-18).
Beste 12 partidu, gaur eta bihar
Gaur eta bihar, 10:00etan hasiko dira partiduak, eta 12 jokatuko dira guztira. Gaur ariko dira Salaberria-Ruiz, Apezetxea-Sagardui eta Legarreta-Elizegi; Aizkorbe-Apezetxea, bihar.