Iñigo Legorburu eta Iñaki Sanz-Azkue sarituak izan dira Hondarribiako Kulturetxean Satarka eta Bordari literatura lehiaketetan. Satarka poesia lehiaketaren alorrean Iñigo Legorburu gailendu da helduen mailan Ni naizen (h)ura idazlanarekin. Laugarren urtea da jarraian lehiaketa honetako sari preziatuenaren jabe egiten dela Legorburu, baina aurtengoan exaequo eman diote saria, Gotzon Plazaren Equinoccio lanarekin berdinduta.
Ni naizen (h)ura lanarekin, egilearen hitzetan «nitasuna eta ura landu nahi izan ditut poema lan bakarrean. Distantziatik tratatutako ni-tasun bat agertzen saiatu naiz, ‘gizarte likido’ edo ‘memoria urtsua’ kontzeptuekin besteak beste, nahasten saiatu naizena». Legorburuk, 800 euro eta oroigarria lortu ditu.
Iñaki Sanz-Azkuek berriz, Bordari ipuin lehiaketako Hondarribiar onenari dagokion saria irabazi du Piodebana lanarengatik. Piodebana hori, hodeitza bat da, itsasoan atzeman daitekeena eta egileak hondarribitar arrantzale familia baten gorabeherak kontatzeko baliatu du. Sariarengatik, 400 euro eta oroigarria eskuratu ditu.
Legorburu, bigarren Gasteizen
Arratsaldean berriz, Legorburuk Gasteizen jaso zuen Afro etorkin afroamerikarren erakundeak antolatzen duen literatura lehiaketako bigarren saria. Lagun iezadazu bestelako mundu bat aurkitzen lehiaketan, Legorbururen Biziberritzen lanak 190 euro eta diploma jaso zituen saritzat.
Aniztasunean bizitzea eta komunitateen arteko loturak bultzatzea bilatzen du lehiaketa honek eta Legorburuk, elkarrekin ospitalean topo egiten duten arraza ezberdinetako bi neraberen abenturak kontatzen ditu.