Aurreko urtean eman zion hasiera Udalak Oroimen historikoa berreskuratuz ekimenari, eta aurten jarri dute martxan bigarrenez, emakumezkoak protagonista bihurtuz: Andreen Iragan Bizia.
Antzezlan batekin hasi ziren jarduerak hilaren 1ean, eta datozen bi asteetan borobilduko dituzte beste hainbat ekimenekin.
Gaur izango da horietako bat; Intxorta 1937 Elkarteak antolatuta, Biterin inauguratuko dute Emeek Emana erakusketa. 63 emakumeen testigantzekin eta beren erretratuekin osatutako erakusketa da, eta hilaren 30era arte ikusi ahal izango da Biterin, 18:00etatik 20:00etara.
Gaur inauguratuko dute ofizialki, 19:30etan, eta bertan izango dira erakusketan parte hartzen duten hernaniarrak: Miren Clemente, Bittori Barcena, Begoña Gorospe... Gainera, Joana eta Ainara Ortegak musikatuko dute ekitaldia.
EGITARAUA
ABENDUAK 11-30
18:00-20:00, Erakusketa, Biterin: Emeek emana. Intxorta 1937 Elkartea. Inaugurazio ekitaldia, abenduaren 11n arratsaldeko 19:30etan.
ABENDUAK 14, osteguna
19:30etan, Hitzaldia euskeraz, itzulpen zerbitzuarekin: Biziraupena ardatz; Hernaniko emakumeen hainbat lan ibilbide (Berdintasun Arloko ikerketa beken azalpena). Biteri kultur etxean.
Jarraian, Bideo emanaldia: Ahotsak; Hernaniko emakumeen testigantzak. Euskeraz, gaztelaniazko azpitituluekin.
ABENDUAK 19, asteartea
19:30, Dokumentala (euskeraz, gaztelaniazko azpitituluekin) eta solasaldia: Ama nora goaz? Biterin.
ABENDUAK 12 eta 18
Hernaniko Memoria Historikoaren Belaunaldien Arteko Topaketak. Hernani BHIko ikasleen, eta Zaharren Egoitzako eta Eguneko Zentroko pertsonen arteko topaketak.