Abenduarekin batera eman zion hasiera Udalak Andreen iragan bizia jardunaldiei, Frankismoan egoera latza bizitu zuten emakumeak isilpetik ateratzeko helburuarekin. Udaleko lau arlok elkarlanean (Artxiboa, Berdintasuna, Kultura eta Zerbitzu Sozialak) antolatutako jardunaldiak dira, eta aurreneko ekintza egin ondoren, bihar inauguratuko dute bigarrena: Emeek Emana erakusketa, hain zuzen. Arratsaldeko 19:30etan irekiko dituzte ateak ofizialki, Biterin.
63 emakumeren testigantzak
Intxorta 1937 Elkarteak osatutako erakusketa da bihar Hernanin inauguratuko dena. Hain justu, 63 emakumeren testigantzekin eta beren erretratuekin osatu dute, horietako batzuk hernaniarrak: Miren Clemente, Bittori Barcena, Begoña Gorospe.... Eta beraiek egongo dira, hain zuzen, biharko inaugurazioan.
Bihar irekiko bada ere, hilaren 30era arte izango da aukera erakusketa bisitatzeko, egunero 18:00etatik 20:00etara.