Hurrengo asteazkenean emango zaio hasiera Donostiako Sagardo Apuruaren laugarren edizioari, eta horren aurretik, ekintza berezia egingo dute Astigarragan. Arratsaldeko 17:00etan iritsiko da idi parea Joseba Barandiaran plazara, gurdian herriko lurretako produktuak dituztela.
Plazan herritarrak izango dituzte zain, eta kalejiran joango dira beraiekin batera Lizeaga sagardotegiaren parera. Han, Albaolako hizlariak euskaldunon eta itsasoaren arteko loturaz hitz egiten duen bitartean, otarrak sasoiko produktuekin prestatu, barrika txikiak hartu eta hala, prest utziko dituzte hurrengo goizean goiz Donostiara jaisteko. Orduan inauguratuko baitute Sagardo Apurua Donostiako Bulebarrean, eta irekita egongo da igandera arte, hilaren 10era arte.
Astearteko eguna bukatu eta borobiltzeko, afari-meriendatxo bat egingo dute Lizeaga sagardotegian.
Arratsaldeko 17:00etan jarri dute zita Joseba Barandiaran plazan.
Eguerdian, inaugurazioa
Horrela bada, asteazkenean 11:00etan iritsiko da sagardoa eta produktuak Frantziako pasealekura, eta 12:30etan inauguratuko dute ofizialki Sagardo Apurua.