IV. Sagardo Apurua, pasa den asteazkenean inauguratu zuten, Donostiako Bulebarrean eraiki den baserrian, Oinkari Dantza Taldearen Sagartu emanaldiarekin. Aurtengo sagardo berria, Astigarragatik jaitsi zen Donostiara, Urumea ibaian zehar. Ekitaldi ofizialean, instituzio desberdinetako ordezkariek hartu zuten parte.
Laugarren eguna izango du gaurkoa ekitaldiak, eta zitarik azpimarragarriena egingo da gaur bertan. 11:00etan, Euskal Herriko lurralde ezberdinen artean egingo da, uzta berriaren aurkezpena. Bizkaia, Araba, Nafarroa, Iparraldea eta Gipuzkoako Sagardo Berria nola datorren aurkeztuko da, eta baita Sagardo Route ere, Sagardotegien Etorkizunerako proiektua. Eta ondoren, 14:00etan, zazpi lurraldeetako produktuen bazkari maridajea egingo da, produktore bakoitzak bere produktuaren berezitasunak azalduz.
Arratsaldean, sagardoa gai hartuta, hura dastatzeko modu berri bat izango da Sagardo Apuruan. Hitzarekin jolastuz, gerturatzen direnek sagardoa bertsotan gozatzeko aukera izango dute, bertso kata musikatuan.
Bolatokia eta herri kirol desafioa, bihar
Bihar herri kirolen eta desafioen txanda izango da. Egun guztian zehar jarriko dute bolatokia. Goizean, familiei eta herritarrei zuzendutako herri kirol desafioa izango da kioskoan. Eta haurrek, jolasak egin ahal izango dituzte, herri kirolen mundua gehiago ezagutuz.
Aitzol Atutxa eta Idoia Etxeberria txapeldun haundiek, aizkoran eta harrijasotzen ikuskizun bikaina prestatu dute eguerdirako.
Hernaniko dultzaineroek girotuko dute goiza musikarekin, eta laugarren Sagardo Apurua erromeriarekin amaituko da, arratsaldean, Estanga anai-arreben doinuekin.
Sagardoa eta deribatuak, gure edari
Baserri tolarearen bereizgarria da sagardo dastatzea. Gipuzkoako Sagardogileen Elkarteko produktu guztiak izango dira jendearen gozagarri, Apuruan: sagardo naturala, euskal sagardoa jatorri deitura, sagardo apardunak, sagar zukuak, kriantzak eta sagardo ekologikoak, besteak beste. Zati modernoa ere badago, eta gaur Idiazabal gazta egongo da salgai; eta bihar, Baserria km.0.
GAUR
- 11:00: Euskal Herriko sagardoen topaketa eta 2017ko Uztaren aurkezpena.
- 11:00: Sagardo Route proiektuaren aurkezpena.
- 14:00: Euskal Lurraldeetako produktuekin egindako bazkari maridajea.
- 18:30: Bertso kata musikatua.
BIHAR
- Goizean zehar: Herri kirol desafioa eta bolatokia.
- 12:00: Herri Kirolak.
- 12:00: Hernaniko Dultzaineroak.
- 18:00: Erromeria.