Mendiriz mendi
Pirinioetako bidea den GR-11 bidearen bigarren etapa osatzeko proposamena egiten du oraingoan Mendiriz Mendik, abenduaren 17rako.
Lehenengo etapan Gipuzkoa eta Nafarroako lurretan ibili ziren. Oraingo honetan, eta ia etapa guztiak amaitu artean, Nafarroako lurretan ibiltzeko aukera izango da; zehazki, Bidasoa eta Baztan bailaretan.
Usoen bailara
Mendebaldeko Pirinioak oso toki aproposa dira hegaztiek Europan barrena egiten duten migrazioa arretaz ikusteko eta aztertzeko. Udazkenean hegazti pasa izugarria izaten da eta Lindus, Lizarrieta eta Organbidexka inguruko pasabideen orografia-ezaugarriek eraginda, lepo horiek leku ezin hobeak dira Europako hegazti harraparien eta migratzaileen ikerketa egiteko.
Lepo horiek Bide atlantikoetako migrazio-hegaztien behaketa, Lindus proiektuan barruan daude. Proiektuak bi mailatan lan egiten du. Lehena arlo zientifikoan eta bigarrena gizarte arloan. Lehenengo atalean eginiko lanak behaketarako eta datu zientifikoak erregistratzeko balio du. Bigarrenaren helburua hegaztiei behatzeko kultura lantzea eta ingurua ezagutzeko jarduerak garatzea da.
Udazkenero, iparrak edo ekialdeko haizeak jotzen dutenean, Etxalarko zeruan barrena milaka uso pasatzen dira mendi gainetik. Duela 800 urte inguru, artzain batek usoei harriak botatzeko ohitura hartu zuen. Usoak jaisten zirela ikustean, hegaztiak harrapatzeko, apaiz batek sareak jartzeko esan zion. Eta horrela sortu zen ehizatzeko modu berezi hori. Iberiar penintsulan bakarra da, eta harrez geroztik egiten da herrian. Historian zehar luxuzko ikusleak izan dira ehiza horretan, hala nola Napoleon III.a, Alfontso XII.a eta XIII.a. Gaur egun, Kultura-ondasun izendatuta dago. Jarduera hau ikusteko eta ezagutzeko izaten da bisita gidatuak egiteko aukera.
Beratik hasita, Santa Barbara
Bera herritik Ibardin aldera doan errepidea hartu eta metro batzuk aurrerago errotonda bat dago. Bertan GR-11 bidea markatzen duten panel batzuk daude. Eskuinera egin eta Labeaga ikastola alboan jaiotzen den asfaltatutako pista hartu behar da. Baserrien artean bideak gora egiten du. Iturri bat pasa ondoren eskuineko pista hartu eta porlanezko beste pista batera irteten da. Bideari jarraituz Santa Barbara gailurrera iristen da. Bertan Taillon mendian hil ziren hiru mendizaleen omenez oroigarri bat dago.
Gailur-lerroari jarraituz Meakako lepora hurbildu behar da. Bertan pinu artetik gora doan pista hartu eta bideak Sorokogañan uzten gaitu. Bertatik, soro artetik, Idoia lepora jaitsi behar da. Markak jarraituz pista eta bidezidor desberdinetatik putzu batera hurbilduko gara. Zertxobait aurrerago dagoen bidegurutzean eskuinera egin eta Usategietako bideari jarraitu behar zaio Lizarrietako mendatera iritsi arte. Bertan edariak eta oinarrizko produktuak erosteko aukera ematen duen benta dago.
Lepoz lepo, Elizondora
Sara eta Etxalar batzen dituen errepidea gurutzatu eta pistatik jarraitu behar da gero, Xorilepoko lepora iritsi arte. Pista utzi eta, hego-eki aldera eginez, Usotegietara jaisten den bidea jarraitu behar da. Bideak Lakain lepora eramaten du. Zertxobait aurrerago, bide zabal batekin egiten da topo. Bidetik jaitsi eta Argarate erreka igaro ondoren Maritoneako baserrira iristen da. Bertan iturria dago. Bideak hego alde jarraitzen du, Elordi lepora igotzen da eta ondoren, ezkerrera eginez, Iraza lepora jaisten da. Bertan Urtsumiatza lepora eramaten duen pista hartzen da. Bideak gora eta behera egiten du eta hainbat lepo zeharkatu ondoren (Gaineko Soroa, Also, Eskisaroi) aldapak gogor egiten du gora. Atxuela eta Arburu gailurrak beraien mendebaldetik inguratuz Atxuela lepora iritsiko gara. Lepo honetara bide ugari iristen dira. Guk nagusiena hartuko dugu eta Iñaberri leporaino jarraituko dugu. Hemendik aurrera bideak behera egiten du. Bagordi izeneko eremutik pasatuko gara. Bertan mahaiak eta iturria aurkituko ditugu. Jaisten jarraituz berehala gara ibilbidearen amaiera den Elizondo herrian.
GR-11ren BIGARREN ETAPA:
BERA-ELIZONDO
z Non kokatzen da: Nafarroan.
z Luzera: 30 km
z Denbora: 8-9 ordu
z Desnibel metatua: 1.250m gorantz eta 1.150m beherantz.
z Zailtasuna: Zailtasun
berezirik gabekoa. Ibilbide luzea denez, egoera fisiko onean egotea gomendatzen da.
z Beharrezko materiala:
Mendiko material arrunta.
z Mendiriz Mendik
abenduaren 17an egingo du
irteera hau.