ASteazkeneko osoko bilkuran, 2018ko arautegi fiskala eztabaidatu eta onartu zen EAJ eta PSE-EEren aldeko botoekin eta EH Bildu aurkako botoekin. Alegazio epealdian, EH Bilduk hainbat alegazio egin ditu eta gehienak ez ziren onartuak izan. Batetik, EH Bilduk etxe hutsen errekargua %35etik %70era areagotzea proposatu zuen. EH Bilduk uste du etxe hutsen merkatua alokairura bideratu behar dela eta horretarako, zergapetzea aukera bat izan daitekeela.
«Aurreko legealdian, EH Bilduk errekargua aplikatzeaz gain, etxe hutsak alokatzeko diru-laguntza programa abian jarri zuen baina EAJ udal gobernura iritsi denetik, ez du alokairua sustatu ezta errekargurik aplikatu ere».
Bestetik, «EAJren utzikeria ikusita», EH Bilduk seme-alaba bakarreko edo gehiagoko guraso bakarreko familientzat kontribuzioan eta kiroldegiko kuotetan hobariak proposatu zituen. «EAJk eta PSE-EEk bi seme-alaben guraso bakarreko familiei hobaria aplikatzea onartu zuten, seme-alaba bakarreko guraso bakarreko familiei aldiz ez. 2016ko abenduaren 28an osoko bilkurak aho batez onartu zuen seme-alaba bakarreko guraso bakarreko familiei hobariak aplikatzea. Beraz, beste behin eurek emandako hitza ez zuten bete».
«%23ko deskontua aplikatzea seme bakarreko familiei kiroldegiko familia bonuan»
2017ko maiatzaren 4ean, dagoeneko herritar batek, kiroldegiko hobarien inguruan «azterketa interesgarria aurkeztu zuen udalean. Gaur egungo egoeran, 2 helduko familiek, familia bonoarekin 74 euro aurrezten dituzte (%23,3) eta aldiz heldu eta seme-alaba bakarreko familiek 17,35€ aurrezten dituzte (%7)».
EH Bilduren ustez ez du zentzu handirik bi helduz osatutako familiek deskontu gehiago izatea, «diru-sarrera gehiago izateko aukerak dituztenean. Horregatik, seme-alaba bakarreko guraso bakarreko familiei, gutxienez %23ko deskontua aplikatzea ere» proposatu zuen EH Bilduk.
«Herritarrak lanaren erdia egina aurkeztu arren, EAJk denbora falta jarri du aitzakia nagusi moduan eta lotsarik gabe, euren ardura guztiari uko eginez, herritar horiek laguntza behar izanez gero Gizarte Zerbitzuetara joan daitezela esan zuten».
«Beherapen baten ordainetan igoera bat aplikatu da»
Orain arte, haur ekitaldien prezioa 2,5 eurokoa zen guztientzat, haur zein hauei laguntzen dieten helduentzat (izan guraso, aiton-amonak…). Hurrengo urtean, helduek bikoitza ordaindu beharko dute, hau da, 5 euro EH Bilduk ez du ulertzen hau onartu izana.
«Ez dago justifikaziorik horrelako igoera emateko. Neurri honek familia eta haurrei zuzen-zuzenean eragingo die eta batik bat, diru-sarrera gutxien dituzten familiei» dio EH Bilduk.s
Helduen ikuskizunetan haurren sarrera 6 eurotik 3 eurora murriztea ere proposatu eta onartu da eta EH Bilduk begi onez ikusi du. «Baina, onartezina da, beherapen honen ordainetan, beste igoera aplikatzea».
Hau guztiagatik, EH Bilduk, EAJ eta PSE-EEren sentsibilitate falta salatu nahi ditu. «Neurri hauekin oztopo gehiago jarriko dira eta familiei erraztasunak eman beharrean, Udala oztopoak bata bestearen atzetik gehitzen egotea sinesgaitza da. Hala ere, EH Bilduk lanean jarraituko du kultura guztion eskura egongo den eskubidea izan dadin».