Kritiko azaldu da Hernaniko PSE-EE ere, 2018ko udal aurrekontuen proposamenarekin, eta prentsaurrean jakinarazi du, osoko zuzenketa aurkeztu diola: «ez diogu txeke zuri bat emango EH Bilduri. 2018ko udal aurrekontuen proposamena itxurakeria hutsa da, 100.000 euroko zazpi inbertsio partidarekin, urbaniazioak... Zehaztu gabeko partidak dira, ez ikerketa, ez ezer... Azalpen bakarra da, irekitzen dituztela, etorkizunean gerakinarekin eta fondo forala haunditzearekin gauzatzeko. Hori onartu behar badugu, eta zain egon Karabel eta Etxeberriko bigarren faseetan bezala, jai dugu», kritikatu du Ricardo Crespo bozeramaileak.
«Sarreren partida puztuta dago, eta ez da zentzuzkoa»
Beste hainbat arrazoi ere eman ditu PSE-EEk, osoko zuzenketa aurkezteko. «Uste dugu sarreren partida puztuta dagoela, eta ez dela zentzuzkoa. Zuhur jokatzeko eskatzen digute kontu horrekin, baina kiroldegiko sarrerak izugarri haunditu dituzte aurrekontuan: bazkideen %10eko igoera, igeriketa ikastaroetan %170ekoa, eta bestelako ikastaroetan 19.000 euro gehiago, izango liratekeenak 879 pertsona gehiago aerobik edo zunba egiten, edo 532 gehiago TRX egiten».
Gastuei dagokienez, aldiz, PSE-EEk nabarmendu du, bi arrazoigatik haunditu egin dela hondakin bilketarena: «industria poligonoetan biltzen ditugulako, eta batez ere, Astigarraga Garbitaniatik atera denez, dauden bazkideek asumitu behar dutelako bere zatia; 580.000 euro gehiago suposatzen du horrek, guztira 2.771.000 euro 2018an».
Eta Udalbiltzarentzako partida ere kritikatu du: «45.000 eurora haunditu da, udalerri independentisten elkartearentzako partida hori. Eta alkateak berak, elkarteko presidente bezala azaldu duenez, asmoa da Euskal Herria nazio izateko bidean pausoak ematea».
«Ezabatu egin dira laguntzak, leiho eta igogailuentzako»
Bestalde, jakinarazi du ezabatu egin direla dirulaguntzak, Kaxkoko leihoak aldatu edo igogailuak jartzeko: «arrazoitu dute ez direla eskatu, baina ez da egia. Eta askotan, izan daiteke dirulaguntzak ez ematea, baldintzak oso konplikatuak direlako; adibidez, inbertsioa dagoeneko ordainduta egotea. Edo izan daiteke, dirulaguntza horiek ez argitaratu izana. Baina ez dut uste, Hernanin ez dagoenik bizilagun komunitaterik, dirulaguntza nahi duena igogailua jartzeko».
Azkenik, eskatu dio Udalari, gehiago inbertitzea herri barruko autobusean: «ez da posible ordubetero pasatzea. Herriko puntu guztietara iritsiko den zerbitzua behar dugu, Galarreta edo Ereñotzura ere bai».