Komunikabideetan gaia azaleratu ondoren, Plenoan atera zuen Andoni Gartziak, EH Bilduko bozeramaileak. Autobus publikoaren zerbitzuaren murrizketen puntua eztabaidatzera zijoazenean argitu nahi izan zuen gaia, EAJren Udal Gobernuak aurreko astean jakinarazi zuena: «EH Bilduk jakinarazi dio Udal Gobernuari ez dela azalduko Berdintasun eta Mugikortasun Batzordera [...]. Ez-egote hau gertatu da Udal Gobernuarekin beste gai batzuen inguruan dauzkan desadostasunen ondorioz; horrek eragin zuen Emakumeenganako Indarkeriaren Kontrako Nazioarteko Eguna landu gabe uztea».
Horren inguruan, Gartziak bere haserrea adierazi zuen Plenoan, eta «gezurra» esan izanaz salatu zuen Udal Gobernua. Asteazkenean esandakoa, prentsa-ohar bitartez azaldu du EH Bilduk.
Garraio publikoa, arrazoia
Bai Plenoan, baita oharrean ere, EH Bilduk argitu nahi izan du garraio publikoarekin zerikusia daukala: «Aldundiak martxan jarri nahi duen autobus zerbitzuen murrizketa izugarriari aurre egitea da Astigarragak duen erronka nagusietakoa. Ez da inolaz ere onargarria, murrizketak egingo zirela jakin zenetik Mugikortasun Batzorderik deitu ez izana eta are gutxiago, deialdia egin denean, gai ordenan aipatu ere ez egitea. Horixe bera salatu nahi izan genuen parte-hartzeari uko eginez. Astigarragak inoiz jasan duen autobus zerbitzu murrizketa handienaren aurrean, EAJk ez duela gaia batzorde batean jorratu nahi. EAJk murrizketak babestu eta murrizketa hauek ahalik eta isilenean pasatzea nahi badu, ez du EH Bilduren babesik aurkituko».
Horren aurrean, «EAJ, EH Bildu erasotzeko Indarkeria Matxistaren aurkako Eguna erabiltzeko gai izan da». Gainera, EH Bilduk dio: «Batzordea informatzailea besterik ez zen, beraz, EH Bilduk ez zuen ezer ere eragotzi, EAJk aurkakoa saldu nahi izan arren».
Alderdi abertzalearen ustetan, «orain EAJk berdintasunaren aldeko ekintzaile sutsu bezala saldu nahi du bere burua baina errealitatea bestelakoa da. Gogorarazi behar zaie duela 2 urte, 2015eko azaroaren 25ean ez zirela Harituzek deitutako kontzentraziora azaldu. Konpromiso faltaren erakusle argia ordutik hona. Argazki asko baina lan-gogo gutxi».
2011tik, teknikaria
EH Bildu aurreko legealditik gai honen bueltan lanean aritu dela dio: «2011n Berdintasun Saila osatu eta berdintasun teknikaria izendatu zen. EH Bildu izan da berdintasun politiketarako aurrekontu gehiago bideratzeko alegazioak egin dituen bakarra».
Horrez gain, «EH Bilduk proposatuta eta plenoak onartuta, Mapa Morea osatu zen baina hau gauzatzeko dirua jartzeko garaian, EAJk eta PSE-EEk ezetz esan diote EH Bilduk eginiko eskaerei».
Horregatik EAJri esan nahi diote «emakume talde bati harrera egitea eta ekitaldi batean hitza hartzea ondo dagoela, baina indarkeria matxistari aurre egiteko eta berdintasunean sakontzeko, erabakiak eta neurriak martxan jarri behar direla».